Humbi gishtat me kapsollë, i heqin KEMP- in pas 18 vitesh
Nëna e 26- vjeçares: Vajza nuk është e aftë të bëjë punë
Humbi pesë gishta si pasojë e një shpërthimi të një kapsolle kur ishte 8 vjeçe, i heqin pagesën e KEMP- it pas 18 vitesh.
Kështu vendosi komisioni epror i caktimit të paaftësisë për punë në Tiranë për 26- vjeçaren Eliana Loli, banore e fshatit Fitore, Bashkia Finiq. Ashtu si edhe për invalidë të tjerë, mjekët e Sarandës e drejtuan 26vjeçaren Loli në komision përkatës të kryeqytetit, procedurë të cilën ajo e ka ndjekur çdo vit. Por ndryshe nga vitet e mëparshme, ku mjekët kanë konstatuar paaftësinë e saj për të punuar, këtë vit komisioni nuk e pajisi përsëri Elianën me të drejtën për të përfituar pagesën e përcaktuar të invaliditet. Atë e vlerësuan invalide, por pa grup. Këtë e denoncon të padrejtë Eftihia, nëna e vajzës, e cila jeton me të ardhura të pakta. Sipas saj, e bija aksidentalisht ka humbur nga pesë gishta nga të dyja duart. Kjo e bën shumë të vështirë jetesën e 26- vjeçares. Deri një muaj më parë, ajo kishte statusin e invalidit dhe merrte një pagesë. Nëna e saj kërkon të vihet drejtësi dhe t'i jepet së bijës pagesa që ka marrë për 18 vite me radhë, pasi, sipas saj, vajza nuk është e aftë për punë dhe askush nuk do ta punësonte në atë gjendje.
Znj. Eftihia, si ka ndodhur ngjarja kur vajza juaj humbi gishtat e dorës duke mbetur kështu invalide dhe e paaftë për punë?
Ngjarja e rëndë vajzës i ka ndodhur në vitin 1999, pra 18 vjet më parë, kur ajo ishte vetëm 8 vjeçe. Doli në rrugë asokohe, si gjithë fëmijët e tjerë. Duke lëvizur gjeti një kapsollë. Ishte fëmijë dhe e mori në dorë duke mos e ditur se çfarë ishte dhe se kjo i rrezikonte jetën. Vajza nisi të luajë me të dhe fatkeqësisht i shpërtheu në duar. Ashtu të mbytur në gjak e mora dhe e çova për ta mjekuar në spitalin e Janinës. Ndenjëm shumë në spital. Edhe kur doli nga spitali, herë pa here shkonim sërish për vizita ku mjekët shihnin se si ecte mjekimi i duarve të vajzës.
Ka humbur të gjithë gishtat e dorës?
Nga dora e majtë ka humbur tre gishtat e parë, gishtin tregues dhe atë të dytë e të tretë. Ndërsa nga dora e djathtë ka humbur dy gishta, gishtin tregues dhe atë të dytë. Kur është përcaktuar nga komisioni përkatës vajza si invalide? Invaliditeti ka nisur tre muaj pas aksidentit, pra në mars 1999. Fillimisht ka marrë 6 mijë lekë, ndërkohë që vitet e fundit merrte 9700 lekë. Edhe në vitin 2005- 2006 shkoi në Tiranë dhe i dhanë të drejtën e invalidit duke e vlerësuar të aftë për grupin e invaliditetit. Deri më 31 mars 2017, vajza e ka marrë pagesën e invaliditetit. Që nga kjo datë nuk ka marrë pasi komisioni epror i caktimit të paaftësisë për punë në Tiranë e ka vlerësuar invalide, por pa grup.
Po mjekët e komisionit të Sarandës çfarë thonë?
Mjekët e komisionit në Sarandë na thonë se të takon ta marrësh. Ata e dinë gjendjen e vajzës sime.
A i ka aktive duart vajza? Është në gjendje të manovrojë, apo të bëjë punë me to?
Me shumë vështirësi. Mjeku i ka thënë që pesha nuk do të ngresh dhe në dimër duhet që t'i mbash të mbështjella, pra t'i ketë në të ngrohtë. Ajo ka mbaruar në Janinë shkollën e mesme për kompjuter, dietologji dhe edukatore. Ka shkuar në shkollë duke qenë në çdo moment me duart të mbuluara nga sikleti, por edhe se i vinte turp t'i tregonte ato.
Si e kalon kohën Eliana, me çfarë merret në shtëpi?
I kemi marrë një laptop dhe me atë merret ashtu me vështirësi.
Çfarë apeli keni për zgjidhjen e shqetësimit që keni?
U bëj apel institucioneve për zgjidhjen. Kjo është e drejta, nuk dua të më falë askush lëmoshë. Këto komisionet mjekoligjore nuk bien me këmbë në tokë të besojnë atë që vuan, jo vetëm nga mungesa e gishtave, por edhe nga sikleti për të mos u përballur me askënd, se i vjen turp t'i shohin duart.