Digjet natën në Vlorë "Toyota" e një gruaje: S'kam konflikte
VLORË - Një automjet është shkrumbuar plotësisht nga flakët në Vlorë. Ngjarja ka ndodhur në lagjen "Pavarësia" të këtij qyteti ku, sipas policisë, makina në pronësi e shtetases me inicialet O. H. ndodhej e parkuar pranë banesës së saj. Flakët janë përhapur rreth orës 02: 35 të së hënës, pranë një pallati në lagjen "Pavarësia", në brendësi të një blloku banimi. Pavarësisht njoftimit të zjarrfikëses, ajo nuk ka mundur dot të bëjë asgjë. Automjeti është djegur plotësisht, ndërsa informacionet e para nga policia kanë saktësuar se bëhet fjalë për një ngjarje ak- sidentale. Policia ka arritur paraprakisht në këtë përfundim pasi dyshohet se flakët janë shkaktuar nga një shkëndijë elektrike. Gjithsesi grupi hetimor ka nisur punën për sqarimin e rrethanave të zjarrit që përfshiu automjetin tip "Toyota" me targa AA 635 EI. Sipas informacioneve të policisë, mësohet se poseduesja e automjetit nuk rezulton të ketë pasur konflikte me ndonjë person. Edhe gjatë dëshmisë së dhënë në Komisariatin e Policisë Vlorë, pronarja e automjetit, shtetasja O. H., ka deklaruar se nuk ka probleme me askënd që mund të ketë sjellë edhe djegien e automjetit dhe nuk mendon që zjarri mund të jetë nga faktorë të jashtëm. Po ashtu nga hetimet e para të policisë, nuk është konstatuar asnjë indicie për zjarrvënie të qëllimshme. Dhe për këtë arsye, sipas uniformave blu, gjithçka mund të ketë ardhur për shkaqe aksidentale. Gjithsesi, policia nuk përjashtoi as vënien e flakës nga persona të tjerë për motive që ende nuk mund të saktësohen. Ndonëse e zonja e mjetit e ka mohuar ngjarjen si të qëllimshme, policia bëri të ditur se janë duke hetuar edhe në këtë pistë.