Koalicionet për qeverinë, sa mund t'ia dalë Haradinaj
LDK: Jo bashkimit me PDK! VV: S’do mbajmë inat me asnjë
Zgjedhjet e parakohshme të përgjithshme në Kosovë, të mbajtura të dielën e 11 qershorit, nuk kanë nxjerrë asnjë fitues, përkundër sa pretendonin partitë dhe koalicionet e mëdha, të cilat garuan me një kandidat për kryeministër.
Rezultatet nga KQZ, të cilat pritet të certifikohen në javët në vazhdim, kanë treguar se koalicioni PDK- AAK- Nisma ka marrë 39 deputetë, Vetëvendosje ka marrë 31 deputetë, ndërsa koalicioni LDK- AKRAlternativa ka marrë 30 deputetë. Partitë e minoriteteve kanë marrë gjithsej 20 deputetët që i takojnë. Dhe nëse rezultatet certifikohen kështu, asnjë nga tri forcat e mëdha politike në Kosovë nuk arrin dot të formojë një qeveri në rast se nuk bashkëpunon me një tjetër parti apo koalicion në treshe. Bashkimi i secilës prej tyre me deputetët e minoriteteve nuk do t'i mundësonte shumicën e nevojshme parlamentare prej 61 deputetësh, në Kuvendin me 120 ulëse. Gjatë ditës së hënë, kandidati për kryeministër i forcës së parë politike në Kosovë, Ramush Haradinaj, është shprehur se formimi i qeverisë nuk do të jetë një proces i vështirë, por nuk ka thënë se ku bazohet ai për këtë. Ka lënë të kuptohet thjesht se ai do të jetë i hapur për bashkëpunime, pasi është pjesë e një brezi që ka sakrifikuar gjithçka për Kosovën. Por ai do ta ketë të vështirë. Nga koalicioni i LDK e kanë përjashtuar mundësinë e bashkëpunimit me çdo qeveri që do të ketë PDK- në pjesë të saj dhe PDK është pjesë e koalicionit të Haradinajt. Ndërsa nga Vetëvendosje kanë dhënë sinjale se do të mund të bashkëpunojnë me LDK- në vetëm me kushte. Kandidati për kryeministër nga koalicioni parazgjedhor LDK- AKR- Alternat iva, Avdullah Hoti, tha se liderët e partive të koalicionit kanë mbajtur mbledhje pas rezultateve të zgjedhjeve. Hoti njoftoi se në këtë takim u bë e ditur që asnjë nga partitë e koalicionit nuk do të jetë pjesë e Qeverisë ku është e Partia Demokratike. Ndërsa edhe më tej, as Hoti e as ndonjë zyrtar tjetër i LDK- së nuk është deklaruar për qëndrimin që ka kjo parti ndaj Lëvizjes Vetëvendosje. "Koali- cioni përsërit qëndrimin e palëkundur se nuk do të jetë pjesë e asnjë qeverie, në të cilën është edhe PDK- ja. LDK- AKRAlternativa dhe Lëvizja për Drejtësi theksojnë se koalicioni është unik në të gjitha qëndrimet", thuhet mes të tjerash në njoftimin e Hotit në "Facebook". Ndërsa Albin Kurti, kandidati i Vetëvendosjes për kryeministër, ka falënderuar qytetarët për votën që i dhanë në zgjedhjet e 11 qershorit, që ishin dyfishi i votave në krahasim me zgjedhjet e 2014- s. Kurti tha se kjo fitore duhet të përkrahet edhe nga partitë tjera, për të cilat ka vlerësuar se nuk mban inat dhe se nuk do t'i revanshohet askujt. "Njëri koalicion me 16 parti dhe koalicioni tjetër janë tkurrur shumë në krahasim me zgjedhjet e kaluara. LVV jo vetëm që është partia e parë, ajo është rritur më shumë se dyfish në krahasim me zgjedhjet e fundit të vitit 2014. Jemi rritur me 120 për qind... Me këto zgjedhje u vërtetua se qytetarët i dhanë të drejtën protestës dhe rezistencës opozitare", tha ai. Kurti ka kujtuar edhe prioritetet e Vetëvendosjes, një ditë pasi kjo lëvizje ka paraqitur kushtet e një bashkëpunimi të mundshëm me LDK- në.