"Bashkëpunoni pa marrë parasysh përkatësinë partiake"
Sipas porosisë së Beogradit zyrtar, kryetari i Listës Serbe në Kosovë, Slavko Simiç, tha se në zgjedhjet e jashtëzakonshme në Kosovë, kjo parti ka bërë një gol të madh politik. Sipas tij, nga të dhënat e fundit, Lista Serbe ka fituar 9 nga 10 vendet e rezervuara për serbët, por rezultatet nuk janë certifikuar. Simiç tha se Lista Serbe ka marrë më shumë se 40 mijë vota, duke shënuar një numër rekord të votave për partinë serbe në Kosovë. Ai ka theksuar se tani kanë mjaftueshëm deputetë për të parandaluar një ndryshim të Kushtetutës, ndryshimin e kufijve, si dhe për të kundërshtuar formimin e Ushtrisë së Kosovës.
Pas zgjedhjeve të parakohshme të 11 qershorit dhe daljes së rezultateve nga Komisioni Qendror Zgjedhor në Kosovë, Ambasada e SHBA- ve në Prishtinë ka uruar që formimi i qeverisë së re të ndodhë shpejt, duke shpresuar në bashkëpunim të ngushtë me këdo që formon atë. Ambasada Amerikane në Kosovë ka përgëzuar popullin dhe institucionet kosovare për zgjedhjet demokratike të mbajtura më 11 qershor. Në njoftimin e publikuar të hënën në faqen zyrtare thuhet se: "Ambasada e Shteteve të Bashkuara përgëzon popullin e Kosovës për zgjedhjet demokratike... Votuesit e Kosovës e kanë thënë fjalën e tyre dhe tani procesi i formimit të qeverisë së re duhet filluar. Shpresojmë në bashkëpunim të ngushtë me këdo që formon qeverinë e re. Shpresojmë që të gjithë zyrtarët e sapozgjedhur të Kosovës, pavarësisht përkatësisë partiake, do të përkushtohen për të ndërmarrë hapa për të mirën e gjithë qytetarëve të Kosovës. Kosova gëzon mbështetjen e SHBA në rrugëtimin e saj drejt integrimit të plotë Euro- Atlantik", thuhet mes të tjerash në njoftim.