Vuçiç: Fitorja e bllokut të UÇK- së na krijon shumë probleme

Kryeministri aktual dhe Presidenti i zgjedhur i Serbisë, Aleksandar Vuçiç, tha pas zgjedhjeve në Kosovë se: "Ne duam një dialog serioz me shqiptarët, por ata duhet të dinë se ne dëshirojmë që t'i ruajmë interesat e Serbisë dhe serbëve në Kosovë. I ashtuquajturi koalicion i luftës ose veteranëve, i cili ka fituar shumicën në zgjedhjet në Kosovë, është grup që kërcënon hapur serbët, dhe kjo do të na krijojë shumë probleme", tha ai, duke shtuar se koalicioni në Prishtinë tani ka kundrejt vetes një bllok të unifikuar të përfaqësuesve politikë të serbëve, të cilët do të mbrojnë interesat e tyre. Edhe zëvendëskryeministrja e Serbisë, Zorana Mihajloviç, ka thënë se pas zgjedhjeve në Kosovë, asgjë nuk do të jetë në gjendje të funksionojë pa serbët dhe përfaqësuesit e tyre politikë. Ajo paralajmëroi se shumë shpejt pritet formimi i Asociacionit të Komunave me Shumicë Serbe. "Zgjedhjet kanë treguar paqëndrueshmërinë e shqiptarëve, por stabiliteti dhe uniteti i serbëve për ne janë shumë të rëndësishëm. Ka ende shumë punë për t'u bërë në Kosovë, shumë shpejt ne presim formimin e komunave me shumicë serbe", tha Mihajloviç. Për rezultatin e zgjedhjeve është shprehur edhe kryetari i Këshillit për Kosovën në Kuvendin e Serbisë, Milovan Drecun, i cili tha se: "U dëshmua që përmes Listës Srpska, shteti i Serbisë do të jetë pashmangshëm i pranishëm në Kosovë". Drecun vlerësoi se pas zgjedhjeve, "është arritur uniteti i përfaqësuesve politikë serbë" dhe ky, sipas tij, nuk do t'u lërë vend shqiptarëve të ndërhyjnë e të përzihen, duke shtuar se askush nuk mund të kontestojë më se Serbia është faktor i vetëm dhe i patejkalueshëm që mund të flasë në emër të popullit serb në Kosovë.