Rama i përgjigjet Metës: S’ka nevojë për kërcënime
“Ka reagime nervoze, por ne kemi luftë për të bërë shtet”
Për Kryeministrin Rama vendi nuk ka nevojë për britma e kërcënime. Përmes një statusi në Facebook, Rama iu përgjigj dje në mbrëmje deklaratave të kryetarit të Kuvendit, Ilir Meta, të bëra gjatë një takimi elektoral në Zharrëz.
“Shqipëria s’ka nevojë për britma e kërcënime, por për shtet, punë, mirëqenie. Ndaj të mos flasim me vete e për vete, po me njerëzit e për njerëzit”, shkruan Rama në Facebook. Gjatë takimeve elektorale të zhvilluara dje në qarkun e Dibrës, kreu i qeverisë u shpreh kundër partive të vogla, që sipas tij kërkojnë vetëm poste drejtorësh dhe vende pune. “Duhet të transformojmë administratën dhe kjo nuk është luftë midis një partie me një parti tjetër. Ne nuk kemi luftë me njeri. E shoh që ka reagime shumë nervoze, është puna e tyre. Për ne nuk është luftë politike, por luftë për të bërë shtet. Partitë politike duhet të tërhiqen nga zyrat dhe njerëzit më të zotë që duan t’i shërbejnë shtetit e që duhet të futen në punë. Një qytetari që shkon për të marrë shërbime në një zyrë shteti i del një zyrë partie. Ne jemi gati që ta hapim këtë luftë. Të tjerët nuk janë gati, sepse te ky sistem ushqehen. Ne nuk e kemi këtë vizion. Jo vetëm këto janë të bëshme, por nuk i bëjnë dot të tjerët. Nuk kanë as vizionin, as programin dhe as liderë. Ne ndërmorëm reforma të vështira, që të tjerët nuk guxojnë dhe jo më të ndërmarrin ato. Administrata shtetërore duhet t’u kthehet njerëzve, jo partive”, tha Rama. Kryeministri Edi Rama u premtoi banorëve të Dibrës Rrugën e Arbrit, duke theksuar se ajo do të përfundojë brenda 4- vjeçarit të ardhshëm. Rama tha se shumë shpejt do të nisë puna, duke premtuar si afat më të afërt muajin shtator. “Patjetër që Rruga e Arbrit do të nisë nga puna me të përfunduar kontrata. Procedura është drejt përfundimit dhe në një periudhë shumë të shkurtër do të jemi këtu për të hapur kantierin e ndërtimit. Brenda shtatorit do të fillojmë punën. Ama kemi projektin, kemi financimin, kemi edhe kompaninë që është ofruar dhe se sa të mbyllim kontratën do të nisim punën. Brenda 4 viteve të ardhshëm, Dibra do të jetë e lidhur me Tiranën”, tha Rama.
Duke u kërkuar votën banorëve, Rama u shpreh se synimi është hapja e dy portave deri në fund, ajo e drejtësisë dhe administratës, në mënyrë që ato të jenë në shërbim të qytetarëve. “Sot patjetër ka ende shumë për të bërë dhe, çka kemi bërë në këta 45 muaj, nuk është e mjaftueshme, por kemi dhënë provën se ne mund të bëjmë shtet për këdo, pa dallim. Shtet që për këdo që shkon në Gjykatë dhe që nuk është i detyruar ta blejë të drejtën e tij, por merr atë që i takon, shtet që shkon në një zyrë për të marrë shërbime dhe të marrë shërbimin siç i takon. Janë këto dy porta, që ne duhet të hapim deri në fund, porta e drejtësisë dhe portat e administratës shtetërore, porta e gjykatës dhe portat e zyrës së shtetit që të mos ketë më zyra shteti që shesin patenta, që shesin dokumente, që shesin hipoteka, zyrtarë që nuk u shërbejnë qytetarëve”, tha Rama.