Mashtrimi, Prokuroria: Shtatë vjet burg Rrakllit
Akuza kërkon shpalljen fajtor të ish- futbollistit
Altin Rraklli, ish- futbollisti i Kombëtares shqiptare të futbollit dhe ish- trajneri i ekipit përfaqësues të futbollit për femra, rrezikon një dënim me 7 vjet heqje lirie.
Kjo është masa e dënimit e kërkuar dje nga ana e Prokurorisë së Tiranës, në një proces gjyqësor ku Rraklli është në rolin e të pandehurit për akuzën e "mashtrimit me pasoja të rënda". Sipas Prokurorisë së kryeqytetit, ish- futbollisti akuzohet se i ka marrë një të njohurit të tij një shumë të madhe parash, të cilat nuk ia ka kthyer më. Gjykimi u zhvillua në mungesë të të pandehurit Rraklli, i cili u përfaqësua nga një mbrojtës ligjor. Seanca e radhës ku gjykata do të njihet me konkluzionet e mbrojtjes pritet të zhvillohet pas dy javësh.
PRETENCA
Përfaqësuesi i akuzës në këtë proces gjyqësor, Genci Qano, lexoi dje para trupit gjykues të kryesuar nga gjyqtari Sokol Tona konkluzionet përfundimtare të Prokurorisë të dosjes gjyqësore në ngarkim të të pandehurit Altin Rraklli. Bazuar në provat e paraqitura në gjykim, rezulton e provuar se i pandehuri Rraklli përmes veprimeve të tij ka konsumuar plotësisht elementet e veprës penale të "mashtrimit më pasoja të rënda". Sipas akteve të dosjes, prokurori ka pohuar se i pandehuri Altin Rraklli dyshohet të ketë mashtruar shtetasin Ilir N., i njohur prej tij. Nga hetimi ka rezultuar se Rraklli i ka marrë shokut të tij Ilir N. një shumë prej 150 mijë eurosh, me pretendimin se i nevojitej për ndërtimin e një godine. Njëkohësisht ai ka premtuar kthimin e shumës në hark kohor të caktuar. Por në vijim, sipas Prokurorisë, ishfutbollisti nuk i ka kthyer shumën sipas premtimit. Rraklli akuzohet se nuk u është përmbajtur pikave të kontratës së huas dhe se nuk i është përgjigjur shtetasit Ilir N. për kthimin e parave. Referuar shumës së dënimit të shkaktuar, 150 mijë euro, Prokuroria e ka konsideruar si mashtrim me pasojë të rëndë rastin në fjalë. Sipas prokurorit, i pandehuri duhet të shpallej fajtor dhe të dënohet me 7 vjet heqje lirie. Për shkak se çështja gjyqësore në fjalë u shqyrtua me procedurën e gjykimit të shkurtuar dhe lehtësive që jep për të pandehurit ky lloj gjykimi, prokurori i kërkoi trupit gjykues të mbajë parasysh uljen e një të tretës së masës së dënimit.
GJYKIMI
Dosja penale në ngarkim të Altin Rrakllit u regjistrua në Gjykatën e Tiranës më 21 prill 2017. Shqyrtimi gjyqësor nisi në maj dhe dje ishte seanca e tretë në radhë e këtij procesi. Në seancat e kaluara Gjykata e Tiranës pranoi kërkesën e bërë nga mbrojtësi i të pandehurit Rraklli për zgjidhje të çështjes me procedurën e gjykimit të shkurtuar. Me procedurën e gjykimit të shkurtuar, nëse Rraklli do të shpallet fajtor në lidhje me akuzën e ngritur nga Prokuroria ndaj tij, ai do të përfitojë uljen e një të tretës së masës së dënimit që do të vendoset nga gjykata.