Demiraj jep medalje nderi pas vdekjes për Artan Cukun
Ish- drejtuesit të Policisë, Artan Cuku, i jepet medalje nderi për merita dhe shërbime të veçanta. Medalja është dhënë nga ministri i Brendshëm, Dritan Demiraj dhe pritet që t'u dorëzohet familjarëve të Artan Cukut. Motivacioni i medaljes është për merita dhe shërbime të veçanta në luftën ndaj krimit dhe sigurimit të rendit e qetësisë publike. Me një vendim qeverie të vitit 2011, ministrit të Brendshëm i jepej mundësia të vendoste për shpërblime morale e financiare ndaj efektivëve të Policisë së Shtetit. Sipas këtij vendimi, medalja e nderit u jepet punonjësve të Policisë së Shtetit, Gardës së Republikës, Policisë së Mbrojtjes nga Zjarri dhe për Shpëtimin dhe Shërbimit të Kontrollit të Brendshëm, punonjësve të shërbimeve mbështetëse, si dhe punonjësve të huaj të Policisë, të atashuar në vendin tonë. Motivacioni i medal- jes është kryesisht për merita dhe shërbime të veçanta në luftën ndaj krimit, sigurimit të rendit e të qetësisë publike, në ruajtjen dhe administrimin e pronës dhe në ushtrimin e përgjegjësive të tjera të parashikuara nga ligji për Policinë e Shtetit, si dhe në mbështetjen e Policisë së Shtetit. Kjo medalje i dorëzohet vetë personit, por në rastin konkret u dorëzohet pjesëtarëve të familjes, pasi Artan Cuku nuk jeton më. Ai mbeti i vrarë në një atentat me armë zjarri mbrëmjen e datës 8 prill të këtij viti. Gjatë karrierës së tij 16vjeçare në Policinë e Shtetit, Cuku ka mbajtur detyra të rëndësishme, duke ngjitur shkallët e karrierës gradualisht dhe duke shërbyer thuajse në të gjitha seksionet e Policisë. Vitet e fundit, para se të dilte në lirim në vitin 2013, ai ka mbajtur edhe detyrat më të larta, si drejtor i Policisë së Vlorës dhe zv. drejtor i Policisë së Tiranës.