Humbi shtëpinë, tenton të vetëdigjet para Gjykatës

DURRES - Në gjendje jo të mirë psikologjike, një 59- vjeçar që ka humbur shtëpinë ka tentuar të lyejë veten me benzinë dhe t'i vërë flakën para Gjykatës së Durrësit. Andon Shkodra mësohet se ka shkuar dje rreth orës 11: 00 para këtij institucioni dhe në mënyrë demonstrative ka tentuar të spërkatet me benzinë, por u ndalua nga një punonjës policie që ndodhej aty. Sipas dëshmitarëve, 59vjeçari u ndalua në momentin final të aktit vetëvrasës. Këtë veprim ai e ka kryer si një formë proteste për të gjetur drejtësi dhe shteti të marrë masa ndaj personave që e kanë nxjerrë ata nga shtëpia. Siç mësohet, ai jetonte bashkë me familjen në një shtëpi ish- pronarësh dhe u detyrua të dilte nga banesa, pasi ajo do të shembej për të ndërtuar një pallat të ri. 59- vjeçari thotë se ndërtuesi i kishte premtuar një banesë në pallat, por ky i fundit ndërroi jetë dhe ndërtesa u çua në fund nga një firmë tjetër, e cila refuzon t'i japë apartamentin e premtuar. Në këto kushte, Shkodra kërkoi hyrje në pallat ( meqë objekti ishte ngritur mbi themelet e shtëpisë ku kishte qëndruar prej vitesh) kërkesë e refuzuar kategorikisht nga sipërmarrësit e rinj. Ai pretendon se e kanë nxjerrë pa të drejtë nga shtëpia dhjetë vite më parë dhe për këtë arsye kryefamiljari ka tentuar për të tretën herë vetëvrasjen, dy herë para Gjykatës së Durrësit, ndërsa një herë më parë ka tentuar vetëhedhje nga pallati. Edhe tri ditë më parë, 59- vjeçari ka kryer të njëjtin veprim dhe është neutralizuar fatmirësisht nga personat që ndodheshin pranë tij. Sipas burimeve nga Policia e Durrësit, 59-vjeçari po mbahet nën mbikëqyrje pas dy tentativave të njëpasnjëshme për t'u vetëdjegur me benzinë. l. m