Miss Shqipëria, mbretëresha e bukurisë zgjidhet në Tepelenë
Zhvillimi i spektaklit Miss Shqipëria 2017 në Tepelenë, pa dyshim përbën një nga ngjarjet më të rëndësishme për këtë qytet. Atmosfera festive ka përfshirë qytetin e Ali Pashës, qëkurse 31 bukuroshet zbritën në qytet dhe nisën të gjallëronin rrugët dhe qendrat turistike me videoklipet e tyre. Pas xhirimeve në Progonat, ditën e shtunë, 11 qershor, në mesditë, bukuroshet u ngjitën në fshatin Lekël, për t'u njohur dhe promovuar kulturën e monumentet e këtij fshati. Një ngjarje që ngjall jo pak kuriozitet tek banorët, të cilët I kanë pritur me këngë e valle misset. Edhe më interesante u bë atmosfera kur nisën xhirimet nga regjisori Petri Bozo. Sheshi i fshatit, Kisha e Shën Marisë, por dhe gatimet tradicionale të zonës, u bënë pjesë videoklipeve, që më shumë se për të promovuar bukuroshet, kanë si qëllim promovimin e trashëgimisë kulturore shqiptare.
Përgjatë tri orëve ato vizituan e zhvilluan xhirime në 7 kishat, kalanë dhe varrin e diplomatit dhe ministrit të Ali Pashë Tepelenës, Thanas Vaja, dhe ujësjellësin e fshatit. Gjithçka u bë e mundur falë mikpritjes së lekljotëve me në krye Foti Sulin, Aleksandër Totin. Për regjisorin Petri Bozo, i cili prej 19 vitesh e zhvillon këtë aktivitet nëpër kalatë e Shqipërisë, ishte një ngjarje e veçantë ardhja në Tepelenë, një ëndërr e prekur me dorë, sidomos pas ndryshimeve të bëra gjatë viteve të fundit, si pjesë e projektit Rilindja urbane. Ai renditi bukuritë e zonës, që e bënë edhe më interesant këtë edicion të Miss Shqipërisë. Por më e bukura pritet të vijë. Mbrëmja finale, në të cilën do të shpallet edhe më e bukura e Shqipërisë, do të zhvillohet të shtunën. Regjisori Bozo premton një spektakël të vërtetë plot surpriza. Vajzat konkurrente janë ato më të emocionuarat, por edhe më të impresionuarat nga qëndrimi në Tepelenë. Një nga konkurrentet, Ornela Fucia, 20- vjeçarja nga Tirana, e cila studion në Fakultetin e Juridikut, viti i tretë, do të shprehej gati e habitur nga bukuritë e zonës. "Jam shumë e impresionuar nga natyra dhe mikpritja e banorëve të kësaj treve. Më ka bërë përshtypje në veçanti fshati Lekël, të cilin nuk e kisha dëgjuar më parë. Një fshat kaq i vogël që ka një pasuri kaq të madhe, me 7 kisha e objekte të tjera që janë një thesar i paçmueshëm i trashëgimisë sonë kulturore". Por deri mbrëmjen e së shtunës, Tepelena ka ende shumë për të zbuluar.