Pranga biznesmenit shqiptar të naftës, me 20 kg kokainë
Mediat greke: I arrestuari, një ndër më të pasurit në Shqipëri
Një biznesmen grek, pronar i një kompanie nafte në Shqipëri, u arrestua në Larisa, pasi u kap me një sasi të madhe kokaine.
Siç raportojnë mediat greke, Athanasios Karatzounis, i njohur edhe si president i një skuadre futbolli, ra në gjurmët e policisë pasi kjo e fundit kishte në hetim prej disa kohësh tre shtetas shqiptarë, njëri prej të cilëve po biznesmen në fushën e naftës. Emri i këtij të fundit nuk është bërë i ditur nga policia vendase për të mos prishur hetimet, por siç raportojnë mediat vendase, ai është një ndër njerëzit më të pasur të Shqipërisë.
Mediat, që u referohen burimeve të policisë vendase, flasin për biznesmenin shqiptar i cili rezulton të jetë "koka" e rrjetit ndërkombëtar të drogës. Gazeta "Espresso" shkruan se shqiptari u arrestua në Trikalla gjatë një operacion antidrogë, që u zhvillua të mërkurën e kaluar, por që deri më dje ishte mbajtur i fshehtë. "Truri i rrjetit ndërkombëtar, gjithashtu i arrestuar në Trikalla, thuhet se është një nga njerëzit më të pasur të Shqipërisë, i përfshirë në biznesin e transportit të gazit natyror dhe naftës, me disa aktivitete në shumicën e vendeve të Ballkanit, Turqi, Izrael dhe Katar", shkruhet më tej në "Espresso". Kokaina e sekuestruar ishte paketuar me një logo të "PlayBoy" dhe sipas policisë kishte ardhur direkt nga Kolumbia, konkretisht nga karteli i drogës "Cali". Sipas Policisë, në një banesë të biznesmenit grek në fshatin Lazarina u zbuluan 100 mijë euro cash, që u konfiskuan, si edhe 10 kg e 820 gr kokainë. Kurse 10 kg të tjera kokainë janë gjetur në pronën e njërit prej shqiptarëve në fshatin Fiva.
Siç mësohet, autoritetet në Greqi fillimisht ranë në gjur- mët e trafikantëve nga Shqipëria dhe më pas zbuluan se i përfshirë ishte edhe biznesmeni, i cili është i njohur në shtetin grek, sidomos në zonën e Trikallas, për shkak të një klubi futbollistik që kishte në zotërim. Mësohet se shqiptarët ishin prej kohësh në hetim dhe policia vendosi të ndërhyjë pasi siguroi prova të mjaftueshme me metoda speciale të hetimit. Operacioni u finalizua në një moment kur policia nuk kishte dyshime se nga kontrollet që do të kryheshin do të gjendej drogë, para dhe sende të tjera që implikonin në trafikun ndërkombëtar. Siç mësohet, në momentin e ndërhyrjes, asnjëri prej të arrestuarve nuk tentoi të bënte rezistencë. "Tre shtetasit shqiptarë i kemi pasur prej kohësh në përgjim dhe nëpërmjet tyre ramë në gjurmët e biznesmenit Athanasios Karatzounis. Ne ndërhymë kur arritëm të siguronim të gjitha provat që i implikonin ata në rrjetin ndërkombëtar të drogës", bëri të ditur Policia greke.
Biznesmeni grek i arrestuar mësohet se ka qenë i dënuar më parë për kontrabandë cigaresh në Holandë. Operacioni policor është zhvilluar të mërkurën, ku përveç drogës biznesmenit iu sekuestrua dhe një shumë prej 100 mijë eurosh. Dyshohet se zona e Larisës dhe Trikala ishin stacionet e magazinimit të drogës, nga të cilat më pas ajo shpërndahej në vende të tjera. Athanasios Karatzounis, biznesmen i njohur në Trikalla të Greqisë, ka qenë president i ekipit lokal të futbollit. "Ai ka qenë i arrestuar dhe i dënuar me 4 vite burg në vitin 2000 së bashku me një të afërmin e tij për kontrabandë cigaresh nga Holanda në Greqi. Ata apeluan vendimin e Shkallës së Parë dhe Gjykata e Apelit i la të lirë", bëri të ditur Policia greke. Prej disa kohësh ai mbahej në përgjim, ndërsa policia ra në gjurmët e tij, pasi kishte në hetim tre shtetas shqiptarë, njëri prej të cilëve biznesmen. "Eleftheros Typos" raporton se biznesmeni që është arrestuar, Athanasios Karatzounis, është pronar i një kompanie nafte në Shqipëri dhe i një kompanie të domateve në Greqi. Ai është person me precedentë penalë, pasi më 19 shtator të vitit 2000 u dënua me 6 vite burgim për kontrabandë cigaresh nga Holanda.