Meta në Lezhë: I gjithë populli do të armatoset nëse nuk kapen zagarët

“Deklaratë tërësisht jo vetëm e paligjshme, por tërësisht e papërgjegjshme e Kryeministrit Rama drejtuar Policisë së Shtetit”

Presidenti i zgjedhur, Ilir Meta, deklaroi dje se do të armatosë popullin nëse policia nuk mbron popullin dhe nuk kap kriminelët.

Gjatë një vizite në shtëpinë e kryeplakut të Rraboshtës, në rrethin e Lezhës, i zgjedhur nga LSI- ja, Meta bëri këtë premtim para familjarëve të Gjovalin Mark Gjinit. “I gjithë populli do të armatoset po nuk i lidhi policia ata zagarë. Ja po ta them unë dhe do ta armatos unë popullin po nuk i lidhi policia ata”, tha Meta. Sipas tij, autorët janë pjesë e bandës së Rilindjes, e cila ka në thelbin e saj pabesinë. “Nuk është ngjarje e re që ndodh në Lezhë. Për fat të keq, bandat e Rilindjes janë njohur në të gjithë Europën për shkak, e për fat të keq, të Lezhës. Rilindja tani doli qartë që thelbin e vet ka pabesinë dhe këto gjëra tani janë në ditët e grahmat e fundit të rilindjes. Janë pritat e fundit që zë rilindja për t’i goditur pas shpine për të tjetërsuar vullnetin e shqiptarëve. Pa dyshim këtë Rilindja e bën në bashkëpunim me policinë. Për shkak se janë militantë të Rilindjes jo vetëm mbjellin drogë që e di gjithë Lezha, por edhe kujtojnë se do të kenë fatin apo mundësinë që të përmbysin me dhunë vullnetin e qytetarëve me akte të tilla banditeske e kriminale. Nuk dua të flas më shumë për bisedën që kam bërë me ministrin. Dëshiroj që ai të marrë masa përpara se i gjithë populli i Lezhës të ngrihet e t’i tregojë vendin kësaj bande”, tha Meta. Presidenti i zgjedhur i cilësoi të papërgjegjshme dhe të paligjshme deklaratat e bëra nga Edi Rama për rolin e policisë. “Dua të shpreh shqetësimin e thellë për deklaratën tërësisht jo vetëm të paligjshme, por tërësisht të papërgjegjshme të Kryeministrit Rama drejtuar Policisë së Shtetit. Dua të dënoj heshtjen e Drejtorit të Policisë së Shtetit për këtë deklaratë që shkel rëndë ligjin për Policinë e Shtetit dhe që është një thirrje praktikisht e hapur e përdorimit të policisë në zgjedhje”, tha Meta gjatë një deklarate bërë para Kuvendit të Shqipërisë. Ai iu përgjigj edhe deklaratës së Gramoz Ruçit se mund edhe të sh- karkohet me votat e socialistëve. “Nuk ka shans Rilindja të shkarkojë Ilir Metën. Absolutisht, të jeni të sigurt ju. Janë shqiptarët që do të shkarkojnë Rilindjen, sepse Rilindja nuk bën dot shtet. T’u bësh thirrje policëve, nuk ka ndodhur kurrë kjo. As Berisha i parë, i dyti jo e jo, i treti jam i bindur as nuk ka ndërmend ta bëjë këtë, por asnjëherë nuk ka ndodhur kjo gjë. Çfarë do të thotë kjo? Kjo do të thotë fundi i shtetit, t’u bësh thirrje policëve hiqni kapelet dhe shkoni mblidhni vota për Rilindjen, është fundi i shtetit. Është thirrje gjithashtu për kriminelët që të bashkëpunojnë me policët për të bërë presion mbi votuesit siç edhe po ndodh”, tha Meta.