Kolegji kundër KQZ, i heq numëruesin PR Anëtari i tretë i grupeve të numërimit i kalon LSI
Kolegji Zgjedhor ka pranuar dje ankimimin e Lëvizjes Socialiste për Integrim, duke i dhënë të drejtën që në 90 ZAZ- të e të gjithë Shqipërisë, në të gjitha tavolinat e numërimit të ketë të drejtën të emërojë anëtarin e saj si parti e dytë e maxhorancës. Kolegji rrëzoi dje vendimin e KQZ- së që një javë më parë, anëtarin e tretë të grupeve të numërimit vendosi ta ndajë mes LSI- së dhe PDIU- së. Kolegji Zgjedhor vendosi që anëtari i tretë i grupeve të numërimit të jetë vetëm i LSI-së, ndërkohë që Partia Drejtësi, Integrim dhe Unitet e Shpëtim Idrizit u konsiderua si parti e opozitës dhe do të duhet të ndajë anëtarët e grupeve të numërimit me Partinë Republikane të Fatmir Mediut. Ky vendim u mor nga trupi gjykues i kolegjit, i cili drejtohej nga gjyqtari Gjin Gjoni. “Anëtari i tretë i grupit të numërimit të votave për zgjedhjet e 25 qershorit do të propozohet nga Lëvizja So- cialiste për Integrim, ndërsa anëtari i katërt do të propozohet nga PDIU dhe PR, pas shortit që do të hidhet për çdo ZAZ nga KQZ”, tha dje Gjin Gjoni.
REAGIMET
Juristi i PD- së, Ivi Kaso, e ka quajtur si paradoksal vendimin e Kolegjit Zgjedhor. “Ishte vendim paradoksal, pasi vetë përfaqësuesi i PDIU- së në seancë deklaroi që PDIU- ja është parti maxhorancës parlamentare, ndërkohë që vendimi i kolegjit zgjedhor, pavarësisht këtij qëndrimi të qartë të PDIU- së, vendosi ta cilësojë PDIU- në si parti të opozitës”, tha dje Ivi Kaso. Kurse për ish- ministrin e Drejtësisë, Ylli Manjani, vendimi i kolegjit ktheu KQZ- në në shtratin e saj ligjor. “Ishte një kthim në shtratin ligjor, shtrat nga ku KQZ- ja kishte dalë. Fakt është që për caktimin e numëruesve në mënyrë arbitrare kishte dalë nga shtrati ligjor, sot e riktheu në shtratin ligjor”, tha dje Ylli Manjani.
SHORTI
Komisioni Qendror i Zgjedhjeve pas këtij vendimi të kolegjit rihodhi shortin me gogla, sipas të cilit Partia Drejtësi, Integrim dhe Unitet do të propozojë anëtarin e katërt në të gjitha Zonat e Administrimit të Zgjedhjeve me numër çift, ndërkohë që Partia Republikane do të emërojë anëtarët e grupeve të numërimit në të gjitha ZAZ- të me numër tek. Në 45 ZAZ- të e vendit, Partia Demokratike sipas kësaj ndarjeje të re do të jetë në minorancë, pasi 3 numëruesit e tjerë do të jenë të partive të maxhorancës së majtë. Para hedhjes së shortit kreu i KQZ- së, Klement Zguri, tha se Kolegji Zgjedhor për të njëjtën çështje ka marrë dy vendime të ndryshme.