Urdhri i ministrave teknikë, largim nga puna se u angazhuan në fushatë
Ministri i Drejtësisë, Gazment Bardhi, urdhëroi dje shkarkimin nga detyra të drejtorit të Burgut të Beratit, Arif Dervishi, si dhe drejtorin e Burgut të Kavajës, Durim Perja. Ndërsa ka dhënë dorëheqjen drejtori i Burgut të Elbasanit. Shkarkimi është bërë “me motivacionin e përdorimit të veprimtarisë së institucionit për qëllime politike, pjesëmarrjes së paligjshme në fushatë zgjedhore dhe keqmenaxhimit të institucionit”, thuhet në njoftimin e Ministrisë së Drejtësisë, e cila shton se vendimmarrja ka ardhur pas inspektimeve të realizuara nga Drejtoria e Përgjithshme e Burgjeve. Gjithashtu, ministri Bardhi ka pranuar dorëheqjen nga detyra të drejtorit të IEVP ( Instituti i Ekzekutimit të Veprave Penale) Elbasan Renato Minoli. Ministria e Financave informon Prokurorinë pranë Gjykatës së Shkallës së Parë në Sarandë, që në ushtrim të funksionit kushtetues të ndjekjes penale, të kryejë veprimet e nevojshme për hetimin e z. Enid Hito, inspektor në Drejtorinë e Kontrollit Tatimor, në Drejtorinë Rajonale të Tatimeve në Sarandë. Nisur nga informacionet, Hito rezulton të jetë përfshirë në mënyrë të drejtpërdrejtë në fushatë elektorale, në kundërshtim flagrant me ligjet në fuqi, si dhe me VKM nr. 473, dt. 01.06.2017. Ministrja e Arsimit dhe Sportit, Mirela Karabina, mbi bazën e informacionit të depozituar i ka përcjellë Prokurorisë së Rrethit Gjyqësor Lushnjë kallëzimin penal për drejtorin e shkollës 9- vjeçare, në fshatin Çermë e Sipërme Lushnjë, Agim Maci, për shkak të angazhimit të tij në fushatën zgjedhore në kundërshtim me përcaktimet ligjore. Sipas kallëzimit, ai ka shkelur etikën e drejtuesit të një institucioni arsimor dhe ka ushtruar presion duke kërcënuar me vendin e punës mësuesit e shkollës së tij për t’i detyruar të votojnë për një subjekt politik.