Parking i ri nëntokësor, Veliaj: Lehtëson trafikun
“Investimi zgjidh ngërçin e parkimeve tek ish- Stacioni i Trenit”
Një ditë pasi ndezi dritat e Bulevardit të Ri, kryetari i Bashkisë së Tiranës përuroi parkimin e dytë nëntokësor publik në Tiranë, pas atij te sheshi “Skënderbej”.
Pikërisht në ditën që përkonte me 2- vjetorin e zgjedhjes së tij në krye të bashkisë, Erion Veliaj nuk fshehu kënaqësinë e realizimit të disa projekteve, për të cilat deri dje as nuk mund të mendoheshin. “Dy vite më parë as imagjinohej që Tirana të kishte disa parkingje nëntokësore. Sot hapim të dytin, ndërkohë që brenda vitit do të fillojmë parkingun te stadiumi ‘ Qemal Stafa’, te sheshi ‘ Italia’, për të zgjidhur edhe aty problemin e parkingut”. Parkimi i ri nëntokësor do t’u shërbejë jo vetëm banorëve të zonës përreth, por edhe atyre që vijnë në Tiranë përmes këtij aksi, duke lehtësuar ndjeshëm trafikun. “Parkingu i ri nëntokësor me 328 vende parkimi zgjidh të gjithë ngërçin e zonës së ish- Stacionit të Trenit. Këtu ka shumë institucione shtetërore, është pranë hipotekave, pranë burgut, pranë disa gjykatave, është pranë një pjese të institucioneve universitare, pranë maternitetit, pra ka shumë institucione, të cilat kanë nevojë për parkim”, nënvizoi Veliaj. Plani i afërt i bashkisë për këtë zonë është zhvillimi i saj, duke e projektuar atë si zonë rezidenciale, me biznese, ambiente zyrash, hotele e të tjera. Ashtu siç e nënvizoi edhe një ditë më parë, ky investim do të rrisë edhe më tepër vlerën e pronës te Stacioni i Trenit. “Besoj që për të gjithë banorët e Njësisë 9 në krahun e majtë dhe Njësisë 8 në krahun e djathtë, i ka rënë një fat më i madh. Shpresoj që jo vetëm ata që do të përdorin bulevardin, por të gjithë qytetarët e këtyre dy njësive, 8 dhe 9, t’i shohin hajrin këtij investimi të përkthyer në vlerën e pronës së tyre”. Parkingu mbikëqyret nga 28 kamera, ndërsa pagesa për një orë qëndrim kushton 100 lekë. Ndryshe nga parkingu i parë nëntokësor në kryeqytet, ai te sheshi “Skënderbej”, për të cilin është thënë se do t’i duhen një vit e gjysmë për të shlyer koston e vet, parkingut me 328 vende te Stacioni i Trenit do t’i duhen së paku 4 vite. janë në hapësirën nëntokësore te Bulevardi i Ri i sapohapur. 450 metrat e para të projektit, të inauguruar dy ditë më parë, vetëm se bën të aksesueshëm parkimin, si dhe i shtojnë qytetit një lulishte më tepër