Makina përplas turisten hungareze
BERAT - Një turiste hungareze ka mbetur e plagosur në Berat, pasi u përplas nga një mjet ndërsa vizitonte lagjen muzeale. 73- vjeçarja mbërriti në spitalin rajonal të Beratit me një frakturë në këmbë dhe disa dëmtime të tjera, por fatmirësisht pa rrezik për jetën. E moshuara me inicialet S. M., 73 vjeçe, banuese në Szentes të Hungarisë, mësohet se u përplas nga një mjet tip "BMË" në vendin e quajtur "Porta e Kalasë". Gruaja ishte duke u ngjitur drejt kalasë me një grup turistik në çastin që mjeti dilte nga lagjja. Rrëshqitja në kalldrëmin e lagjes për shkak të pjerrtësisë së rrugës, mësohet se është bërë shkak që drejtuesja e mjetit të humbasë kontrollin dhe të aksidentojë gruan. Kjo e fundit, pas mjekimit në spital, u largua bashkë me grupin e turistëve që po vizitonte vendin tonë. Policia rrugore nga hetimet e para mësoi se shkak i aksidentit është bërë shkelja e rregullave të qarkullimit rrugor nga ana e drejtueses së mjetit, 28- vjeçares me inicialet E. T. Për këtë arsye ndaj kësaj të fundit mësohet se nisi procedimi penal në gjendje të lirë, për veprën penale të "shkeljes së rregullave të qarkullimit rrugor".