Konte pasuron Juventusin, 120 mln për Bonuçi- Sandro
Mbrojtja e Juventusit rrezikon të pësojë një revolucion dhe kjo merkato pritet të jetë e nxehtë në Torino. Për më tepër, njeriu që kërkon të fusë në telashe "Zonjën e vjetër" quhet Antonio Konte. Ish- trajneri bardhezi vazhdon të jetë "i dashuruar" me liderin e prapavijës së Alegrit dhe këtë nuk e ka fshehur kurrë. Gjatë këtyre ditëve, Çelsi ka shtuar presionin për të arritur marrëveshjen për transferimin e Leonardo Bonuçit. Ky i fundit ishte në listën e dëshirave të Kontes që në merkaton e kaluar, por vendosi t'i premtonte besnikëri Juventusit. "Corriere della Sera" bën me dije se blutë e Londrës janë gati të ofrojnë 50 milionë euro për qendërmbrojtësin italian. Ndërkohë, Çelsi është gati të ofrojë 70 milionë euro për kartonin e mbrojtësit brazilian, Aleks Sandro, duke e konsideruar si një goditje për të ardhmen.