Zbardhet SMS, ultimatum për shkarkimin e Tahirit
Marko: Ndërkombëtarët do nxirrnin emrin, prandaj u shkarkove
SHKARKOHET ZV. MINISTRI I LSI/ Ish- ministri i Brendshëm, Tahiri, akuzon Metën se ka tentuar ta përgjojë në zyrë. Zbardhet SMS e zv. ministrit Marko: “S’ishte e nevojshme të të përgjoja o i mjerë, pyet shefin tënd për ultimatumin e partnerëve ndërkombëtarë”. Rama shkarkon zv. ministrin e Brendshëm
Zëvendësministri i Brendshëm, Ilir Marko, ka replikuar dje me ishministrin e Brendshëm, Saimir Tahiri. Fillimisht me një mesazh të dërguar privatisht në adresë të Tahirit, por që i kushtoi më pas shkarkimin nga detyra.
Fillimisht, LSI-ja ka denoncuar me emra konkretë rastet e blerjes së votave në qarkun e Tiranës, duke akuzuar se, pas këtyre veprimeve antiligjore, ishte ishministri i Brendshëm, Saimir Tahiri. Megjithatë, Tahiri ka replikuar me Ilir Metën, duke thënë se tentoi ta përgjonte me anë të zëvendësministrit të Brendshëm, i cili, sipas tij, i ka vendosur një përgjues në zyrë. “Më vure pas një hafije tënden si zv. ministër, që arriti deri në çmendurinë e tentativës për të përgjuar zyrën time”, tha Tahiri.
MESAZHI Por pas këtyre etiketimeve, Ilir Marko, i cili ka qenë zëvendësi i Saimir Tahirit, ka reaguar dje me anë të një mesazhi privat të dërguar në celularin e ish- ministrit të Brendshëm. Në SMSnë e tij të dërguar në orën 15: 00 të ditës së djeshme, theksohet se ish- ministri përgjohej nga shërbime të specializuara të partnerëve ndërkombëtarë dhe jo nga ai si zv. ministër. Marko ka zbuluar në SMS- në drejtuar ishministrit se ndërkombëtarët kanë kërkuar me këmbëngulje shkarkimin e Saimir Tahirit për abuzime. Zëvendësministri e ka quajtur Tahirin si “të mbaruar”, që nuk ia vlente të replikonte, pasi vetëm në këtë mënyrë do të shmangte vëmendjen nga blerjet e votave. “Nuk ishte e nevojshme të të përgjoja unë ore i mjerë, sepse atë punë e bënin shërbime të specializuara, që pasi u bindën për bëmat e tua, rekomanduan shkarkimin tënd. Sepse, nëse nuk do të ishte shkarkuar, “raportet e ndërkombëtarëve do të nxiheshin nga emri yt!”. Nuk do ta jap kënaqësinë e tërheqjes së vëmendjes drejt teje, duke replikuar me ty, sepse një i mbaruar si puna jote këtë do. Por po do shpjegim për shkarkimin tënd, pyet shefin tënd për letrën me ultimatum që ka ardhur për ty nga partnerët ndërkombëtarë. Kështu që mos më provoko mua, sepse edhe 1% shans që të ka ngelur për të vazhduar në politikë bën mirë mos ta rrezikosh. Ilir Marko”, përfundon mesazhi.
VENDIMI Pas kësaj përplasjeje, Kryeministri Edi Rama ka vendosur dje të shkarkojë nga detyra zëvendësminis- trin e Brendshëm, i emëruar nga Lëvizja Socialiste për Integrim, Ilir Marko. Në motivacionin e shkarkimit thuhet: “Për shkelje të papranueshme të etikës zyrtare, në papajtueshmëri të plotë me detyrën e lartë që kryen dhe në shkelje të normave më elementare të komunikimit publik, urdhëroj shkarkimin nga posti i zv. ministrit të Punëve të Brendshme z. Ilir Marko”.