Bilal Kola: Shtatë prioritetet tona
Nga dekomunistizimi tek e drejta e pronës, programi i APD
Partia Aleanca Popullore për Drejtësi ( APD) ka prezantuar dje shtatë prioritete që do të realizojë pas zgjedhjeve të 25 qershorit. Kreu i APD, Bilal Kola, shprehet se Aleanca Popullore për Drejtësi i ofrohet elektoratit pa asnjë mëkat në lidhje me politikën pa bereqet dhe plot konfliktualitet të këtyre 27 viteve, duke u dhënë njerëzve tanë, deri më sot të papërfaqësuar, mundësinë për zgjidhjen e problemeve me anë të përfaqësimit të tyre në organin më të lartë të vendimmarrjes - parlamentin e vendit". Sipas tij "kjo është gara jonë e parë dhe, pavarësisht faktit se APD ka si elektorat natyral rreth 40% të elektoratit që jeton në Shqipëri ( të përndjekurit dhe pronarët legjitimë), si dhe aspiron të shtrojë për zgjidhje çështje të paadresuara në lidhje me diasporën, ne jemi të vetëdijshëm për vështirësitë: Ne nuk kemi lekë, media, vende pune në shtet, tendera, shkëmbim interesash për t'u ofruar zgjedhësve në këmbim të votës, por ajo që ne kemi është e drejta natyrale, morale, kushtetuese dhe ligjore për të përfaqësuar interesat dhe kauzat e papërfaqësuara të komuniteteve që përfaqë- sojmë". Duke renditur prioritetet, Kola shprehet se shtyllat e programit të APD- së janë "1. Dekomunistizimi - Ndërmarrja e iniciativave ligjore sipas praktikave më të mira ndërkombëtare; 2. Muzealizimi, kurrikulat shkollore dhe vlerësimet historike- Krijimi i muzeve të kujtesës, ndërtimin e Memorialit Kombëtar të Kujtesës, saktësimi i kurrikulave, si dhe caktimin e një date përkujtimore, ku shteti dhe shoqëria të nderojë e respektojë viktimat e regjimit komunist dhe martirëve të lirisë; 3. Rehabilitimi - Përmirësime gjithëpërfshirëse të ligjit të cungët të dëmshpërblimit, përcaktimi i kuotës ( 15% - 20%) në programet e punësimit, strehimit dhe arsimit. 4. Prona - Rivendosja e të Drejtës kushtetuese e shtetasve mbi pronën e mohuar dhe të grabitur nga shteti diktatorial, në zbatim të nenit 181 dhe 41 të Kushtetutës. 5. Diaspora - Krijimin e një fondi dhe banke investimesh për diasporën dhe propozimi i një kuote fikse ( jo më pak se 5%) për përfaqësimin e diasporës në Parlamentin e Shqipërisë. 6. Sipërmarrja- Taksë e sheshtë për biznesin në nivelin 7.5 - 9 %, si dhe krijimin e kushteve lehtësuese për investimet rishtazi ose ato me burime nga fitimi/ dividendë të bizneseve ekzistuese. 7. Shteti ligjor dhe sistemi zgjedhor - Mbështetje Reformës në Drejtësi, si dhe vendosjen e një sistemi zgjedhor pa konflikt të brendshëm interesi bazuar në votimin dhe numërimin elektronik".