Tregtarët tërheqin padinë, lirohet i arrestuari për gjobat
TIRANE - Gjykata për Krime të Rënda liroi nga burgu dje Ibrahim Liçin, i akuzuar si një prej anëtarëve të grupit të dyshuar për "gjobëvënie" ndaj tregtarëve në Shkodër. Seanca e djeshme u mbajt me kërkesë të avokatëve të të pandehurve. Gjyqtari Luan Hasneziri në seancën e mbajtur me dyer të mbyllura vendosi të ndryshojë masën e arrestit ndaj shtetasit Ibrahim Liçi, duke e lënë të lirë me "detyrim paraqitjeje". Vendimi i Gjykatës, sipas burimeve nga seanca, u bazua në faktin se tregtarët e Shkodrës janë tërhequr dhe kanë pranuar se paguanin me dëshirë tarifën mujore te të dyshuarit për ruajtjen e mal- lit. Nga ana tjetër, Prokuroria pretendon se tarifat merreshin me dhunë nga të dyshuarit çdo fund muaji dhe tregtarët që nuk bindeshin përballeshin me vjedhjen ose djegien e mallit. Po dje, Gjykata e Apelit për Krime të Rënda nuk ka pranuar të li- rojë nga qelia të dyshuarin Fatmir Dibra, edhe pse ai është bashkëpunëtor me grupin e hetimit, duke rrëfyer skemën e gjobëvënieve dhe mënyrën si realizohej kjo vepër penale. Nga ana tjetër, organi i akuzës ka pretenduar se ka prova për të pandehu- rit. Nga veprimet hetimore të Prokurorisë për Krime të Rënda rezulton se ky grup ka qenë aktiv, të paktën që nga tetori 2016, kohë kur është regjistruar procedimi penal kundër tyre. Sipas të dhënave hetimore, ky grup fillimisht ka larguar me forcë nga ky aktivitet kriminal një tjetër grup, gjithnjë nëpërmjet dhunës e kërcënimit dhe më pas ka operuar vetë, duke detyruar tregtarët që të paguanin "taksën mujore" tek ata, kanë thënë burimet zyrtare. Sipas tyre, anëtarët e grupit kishin për detyrë që të zbatonin urdhrat e drejtuesve të grupit, si edhe të raportonin mbi lëvizjet e punonjësve të policisë në zonën e influencës së tyre, apo dhe për persona të panjohur, automjete që janë pranë tyre apo deportojnë në zonën ku ata banojnë dhe ushtrojnë "aktivitet". "Njëkohësisht këta shtetas, në ditët e fundit të çdo muaji, kalojnë në lokalet apo dyqanet, në tregun Zdrale Shkodër, duke mbledhur lekët, duke raportuar dhe dorëzuar lekët e mbledhura tek drejtuesit e grupit. Organizatorët e grupit kriminal, pasi u jepnin porositë anëtarëve të grupit, i dërgonin me makinë në zonën e tregut dhe këta takoheshin me çdo tregtar dhe i merrnin shumat, madje duke mbajtur dhe bllok ku shënoheshin personat që paguanin.