Mashtruan për legalizimin, dënohen
Policia e Tiranës arrestoi 7 persona dhe një tjetër e shpalli në kërkim, pasi dyshohet të kenë përfituar disa kredi duke përdorur dokumente të falsifikuara.
Arrestimi i tyre u krye mbrëmjen e së enjtes gjatë operacionit të koduar "Kredia". Burimet thanë se oficerët e Antikrimit Ekonomik kishin nisur hetimet prej disa muajsh, pas kallëzimit të përfaqësuesve të një banke të nivelit të dytë. Ndërsa gjatë verifikimeve është arritur të zbulohet se bëhet fjalë për një grup personash, që duke bashkëpunuar me njëritjetrin, kishin arritur të përfitonin kredi, jo vetëm te banka që denoncoi ngjarjen, por edhe në disa institucione të tjera financiare. Burime zyrtare të Policisë së Tiranës thanë se u arrestuan shtetasit Arjel Sulejmanaj, 46 vjeç, Elsad Zhabjaku, 23 vjeç, Riselda Hoxha, 32 vjeçe, Albert Shirka, 54 vjeç, Ertgrent Boshti, 26 vjeç, Luan Dana, 56 vjeç dhe Sonila Berberi, 26 vjeçe, të gjithë banues në Tiranë. Gjithashtu është shpallur në kërkim edhe shtetasi me iniciale R. H., si bashkëpunëtor i tyre. Deri tani është provuar se këta persona kanë arritur të përfitojnë shuma të ndryshme parash, si kredi konsumatore, nga disa banka të nivelit të dytë. Ndërsa po verifikohen nëse në të njëjtën formë mund të kenë mashtruar edhe banka të tjera.
OPERACIONI
Policia e Tiranës tha dje zyrtarisht se, për shtetasit e arrestuar është arritur të dokumentohet me prova ligjore se në kohë të ndryshme, duke përdorur dokumentacione të dyshuara të falsifikuara prej tyre, kanë përfituar kredi konsumatore në shuma të ndryshme pranë një shoqërie financiare që ofron kredi. Pas zbulimit të kësaj skeme mashtrimi me dokumente të dyshuara të falsifikuara, është bërë arrestimi i 7 personave dhe shpallja në kërkim e një tjetri. Në cilësinë e provës materiale u sekuestruan dy vula të falsifikuara me logon "Drejtoria e Shërbimit për Tatimpaguesit Tiranë", 8 vërtetime të institucionit të sigurimeve shoqërore të dyshuara të falsifikuara, 6 celularë të markave të ndryshme, si dhe një automjet tip "Fiat". Burime nga grupi hetimor thanë se ende nuk është saktësuar numri i kredive që ata kanë përfituar në këtë mënyrë, por bëhet fjalë për kredi konsumatore, shuma e të cilave shkon nga 100 mijë lekë deri në 500 mijë lekë të rinj. Policia tha se ndaj të dyshuarve janë ngritur dy akuza, ajo e "falsifikimit të dokumenteve, vulave, stampave dhe formularëve", si dhe e "mashtrimit me kredi". Nga ana tjetër vi- jojnë hetimet për identifikimin e personave të tjerë që mund të jenë përfshirë në këtë grup mashtrimi, apo edhe bankave të tjera që mund të kenë miratuar kredi apo janë në proces miratimi, për këta persona. Paraprakisht Policia është në ndjekje të shtetasit me iniciale R. H., i cili nuk u gjet në adresën që dispononin forcat e rendit dhe u bë shpallja e tij në kërkim policor.
TIRANE - Dy persona janë shpallur fajtorë nga Gjykata e Tiranës për mashtrimin e një të treti, të cilit i premtuan legalizimin e banesës. Sipas gjykatës, të pandehurit D. L. dhe T. M. i kanë atij një shumë prej 400 mijë lekësh, me pretendimin që do ta ndihmonin në kryerjen e procedurës së legalizimit të banesës. Në përfundimi të gjykimit, të pandehurit janë dënuar me nga 1 vit e 8 muaj burg. Ata nuk do të shkojnë në qeli, pasi gjykata ka vendosur lënien e tyre në shërbimin e provës për një periudhë kohore nga 3 vjet e 4 muaj, gjatë së cilës nuk duhet të kryejnë asnjë vepër penale. Referuar vendimit të gjykatës, procedimi penal ndaj tyre ka nisur në maj të vitit 2016, pas një kallëzimi të depozituar ndaj tyre. Në këtë kallëzim, i dëmtuari kishte pohuar se u kishte dhënë lekë të pandehurve, me qëllim legalizimin e banesës. Fillimisht, i dëmtuari ka dorëzuar një shumë prej 30 mijë lekësh, të cilën një nga të pandehurit i kishte thënë se duhet t'ia jepte një shokut të tij, që punonte te Legalizimet, për t'u marrë me dokumentet e shtëpisë. Pas dy javësh, kallëzuesin e ka marrë në telefon një nga të akuzuarit, ku i është pohuar se "duhen përsëri para, pasi në zyrë janë 3 veta dhe duhet të firmoste edhe një person tjetër që nuk kishte marrë paratë". "Në të njëjtën mënyrë dhe me premtimin ' për t'i bërë letrat e banesës sa më mirë' i pandehuri i ka marrë kallëzuesit në kohë të ndryshme shumën totale prej 400 mijë lekësh", thuhet në vendimin e gjykatës. Pas disa kohësh, duke parë që nuk po i bëheshin dokumentet për legalizim, kallëzuesi i ka kërkuar të pandehurit që të takonte personin që i kishte marrë përsipër bërjen e dokumenteve. Kërkesa nuk është pranuar nga të pandehurit. Nga verifikimet e bëra pas kallëzimit, ka rezultuar se nuk ka pasur asnjë aplikim për legalizim në emër të kallëzuesit.