Zbulohet laboratori në Korçë, 500 euro për një pasaportë
KORÇE - Policia e Korçës arrestoi pesë persona, pasi u zbulua një laborator që falsifikonte pasaporta, karta identiteti, dokumente të ndryshme shkollore si diploma, dëftesa pjekurie, patenta ndërkombëtare greke dhe shqiptare e dokumente të tjera, por edhe një sasi droge. Sipas Policisë, në operacionin e koduar "Euro Kart" është goditur një grup i strukturuar kriminal për prodhimin dhe shitjen e narkotikëve, si dhe falsifikimin e dokumenteve. Mjetet e falsifikuara shërbenin për të mundësuar kalimin e shtetasve që kishin prob- leme me ligjin apo ekspuls për të dalë jashtë vendit. Nga hetimet e policisë dhe kontrollet që janë kryer 5 të arrestuarve u janë gjetur një sasi dokumentesh, por edhe pajisje që ngrenë dyshimet se përdoreshin për të realizuar falsifikimin e dokumenteve. Burimet e policisë thanë se në bashkëpunim me njëri- tjetrin, autorët e prangosur në kushtet e flagrancës falsifikonin doku- mente shqiptare, greke dhe spanjolle. Me pasaportën e falsifikuar për të cilën paguhej 500 euro, klientët kalonin nga kufiri shtetëror. Policia bëri të ditur se rreth 25 kg lëndë e dyshuar kanabis sativa, aparate lojërash fati, si edhe një laborator i mirëfilltë i falsifikimit të dokumenteve janë zbuluar në një apartament në lagjen nr. 4 të qytetit të Korçës, ndërsa në pranga kanë përfunduar Artur Feçanji, 51 vjeç, Thanas Sholla, 54 vjeç, Asqeri Bebri, 49 vjeç, Vladimir Furtuna, 58 vjeç dhe Shkëlzen Muçollari, 30 vjeç, që të gjithë banues në Korçë. "Hetimet për rastin kanë nisur më se një muaj më parë dhe është punuar për sigurimin e provave të pakontestueshme lidhur me veprimtarinë kriminale të këtij grupi", bëri të ditur Policia.