Pjesëmarrje, incidente të vogla dhe konfirmim i PS
Votimet u mbyllën përgjithësisht si duhet në 12 orët legale, shto këtu edhe orën shtesë të miratuar nga KQZ-ja. Shqiptarët e përkryen detyrën e tyre demokratike për të...
votuar ndryshimin apo mbajtjen e së njëjtës qeverisje në krye të vendit. Dhe tashmë radha u kalon komisioneve të ngritura në të gjithë territorin.
Mbyllet një proces i cili deri diku ishte i tensionuar, sepse ajo çfarë kërkohej, ose ajo çfarë ofrohej në këto zgjedhje ishte një ndryshim radikal i skemës qeverisëse i këtyre 15 viteve të fundit.
Një ofertë e tillë e ngjizur në dy muajt e fundit, ofertë përjashtuese për partinë e tretë, dihej që do të krijonte tension në radhët e ushtrive elektorale, të organizuar në formën e blerësve të votave, shantazhuesve të votave, manipuluesve, numëruesve, në formën e vëzhguesve, pra ushtri që ushqehen dhe mbahen me para të fondeve publike, me paratë e zeza të biznesit, për të përcaktuar në fund formën e qeverisjes. Në fund të fundit për mbikëqyrjen legale të këtyre ushtrive kishte ndryshuar shumëçka. Gjysma e qeverisë ishte teknike. Administrata si kërkesë e PD- së, imponimit të ministrave teknikë të saj, ndryshe nga herët e tjera u vendos në një lloj karantine, për të minimizuar ndikimin e saj. Ja pse parandieja një garë të tensionuar. Kjo parandjenjë që nuk e publikova për të mos ngjarë si Kasandër e së keqes, u konfirmua me incidentin në Durrës, me atë që ndodhi në Shëngjin etj., incidente të vogla dhe të mesme, pavarësisht se zhurma që u bë këtyre ishte e shpërpjesëtuar në raport me atë që ndodhi në realitet.
E preka votimin në orët e para të mëngjesit, kur në mënyrë shumë solemne shqiptarët shkuan të votonin. Do doja të sillja një shembull për ta ilustruar këtë solemnitet elektoral të shqiptarëve prej një gazetari të madh, Furio Colombo. Ai tregon në vitin 1997 për një çift shqiptarësh nga Vora që shkonin të votonin me kostumin më të mirë që kishin, si nderim për votën. Besoj prej atëherë shqiptarët kanë treguar se e respektojnë procesin e votimit dhe demokracinë. Problemi ka qëndruar dhe qëndron tek ushtritë që vendosin partitë në dispozicion të tyre për të numëruar votat, për të zhbërë, për të manipuluar vullnetin e qytetarëve para se të shkojnë te letra e votimit. Shfaqje të tilla keqbërëse kemi parë gjatë kësaj dite, por në fund janë ndërkombëtarët ata që do japin certifikatën.
PSE KISHIM TENSION?
Siç është bërë e qartë, ka pasur një përpjekje të vijueshme dhe të sinkronizuar nga partitë e mëdha për të minimizuar rolin e LSIsë dhe të partive të vogla në skenën elektorale. Kjo krijoi konfliktin mes LSI- së dhe partive të mëdha, por dhe midis vetë partive të vogla.
Në këtë situatë Meta u bë protagonisti më i zhurmshëm i këtyre zgjedhjeve. Nga pikëpamja partiake veprimet e Metës janë të justifikueshme dhe brenda stilit të veprimit të një partie në këta 23 vjet, por jo dhe nga pikëpamja institucionale. Meta sot është president i zgjedhur. Gjatë këtyre 20 viteve zhurmat e liderëve gjatë procesit të votimit për të ndikuar në pjesëmarrje, për të nxitur frikë, janë pjesë e kalkulimeve taktike. Por a i shkon një presidenti të zgjedhur të denoncojë publikisht emra konkretë keqbërësish elektoralë, shefash policie, drejtorin e Përgjithshëm të Policisë, të mbiquajtur prej tij Haki Droga? Kushdo që ka të qartë mënyrën se si funksionon shteti, sidomos në rastin kur kemi të bëjmë me krime zgjedhore, e di se mënyra më e mirë e parandalimit apo ndëshkimit të tyre është që të bashkëpunohet me institucionet ligjzbatuese, me Policinë e Shtetit, pa u përpjekur që me zhurmë të ndikohen votuesit, sepse janë dy zhvillime paralele. Masa elektorale nuk duhet të ndikohet nëpërmjet zhurmës për zhvillimet në një vend të caktuar dhe jo në gjithë territorin. Duhet të pritet funksionimi i institucioneve shtetërore, duhet punuar që ato t’i trimërosh dhe jo për të kundërtën. Në shfaqjen e zotit Meta në zonën e Shëngjinit me rastin e një incidenti të rëndë elektoral u humb qëllimi ndëshkues dhe thjesht u partizua dalja publike e një figure që tashmë defacto nuk është më kreu i asaj partie. Meta sot është presidenti i zgjedhur i vendit, i cili flet në një gjuhë që nuk dihet se kur do të ndryshojë në 23 korrik, disa orë para se ai të marrë detyrën, apo kur.
PJESËMARRJA NË VOTIME
Për sa i përket pjesëmarrjes, po flitet duke iu referuar të dhënave zyrtare se ajo ka qenë e vogël. Në fakt është e vërtetë se ka një rënie të pandjeshme të saj, nëse shifra përfundimtare e votuesve është 1.5 milionë. Por duke marrë parasysh se popullsia rezidente në Shqipëri është diku te 2 milionë e 900 mijë apo 3 milionë, pjesëmarrja elektorale shkon diku te 70%. Pse? Sepse sipas një ligjësie demografike, popullsia e aftë për të votuar, 18 vjeç e lart, nuk është më shumë se 2/ 3 e popullsisë rezidente. Në një popullsi 3 milionëshe, më e shumta janë 2 milionë banorë mbi 18 vjeç e sipër: pra kanë marrë pjesë gati 70% dhe kjo është pjesëmarrje e lartë për një vend që ka 25 vjet që ushtron demokracinë në Ballkan.
Në lidhje me pjesëmarrjen do të doja të sillja rastin e qytetarëve kosovarë me shtetësi shqiptare, ndërsa shumë prej tyre morën pjesë në votim me gjithë “pengesën e festës së Fiter Bajramit” që ndër ta festohet më masivisht. Kosovarët që njoh, u përfshinë me pasion në këtë proces në Shqipëri, në fatin politik të vendit amë. Si duket ata vazhdojnë t’i përjetojnë emocionalisht çdo ndryshim ndër ne, ndërkohë që qytetarë të Shqipërisë preferuan të qëndronin më shumë në plazh. Ndoshta kohës së papërshtatshme për zgjedhje ( festa, sezoni turistik, vapa etj.) i dedikohet dhe rënia në pjesëmarrje ( duke llogaritur dhe largimet e popullsisë), pavarësisht se për shifrat e popullsisë sonë, pjesëmarrja është relativisht e lartë. Një kosovar erdhi votoi në 7 të mëngjesit, ndërsa një familje tjetër miqsh erdhi në finish të votimit. Kësisoj dhe ai që erdhi në mëngjes, dhe ata që erdhën në finish, patën mundësi për të festuar me bashkëqytetarët e tyre, drekën e Fiter Bajramit.
PERSPEKTIVA E REZULTATIT PËRFUNDIMTAR
Shifrat e dhëna nga exit poll- et e IPR Marketing janë koherente në trendin e tyre, për pasojë dhe deri diku realiste, me gjithë ndikimet, apo përpjekjet për të komercializuar rezultatet e tyre pjesërisht nga ata që i kanë komisionuar. Ka një të dhënë nga PS- ja që i konfirmon këto shifra. Sipas saj, Partia Socialiste ka arritur që të konfirmojë numrin e votave në vlerë absolute përafërsisht të barabartë me ato të 2013- s, diku te 700.000 vota në totalin e 1 milion e 400.000, që janë 50% e tyre. Pra, edhe sipas exit poll- it, PS ka marrë shifra të afërta me 49 apo 50 për qind. Ky rezultat prej një partie të vetme si PS, nëse konfirmohet, dërgon në parlament më shumë deputetë sesa dërgojnë dy a më shumë parti, shuma e votave të të cilave është po aq, për shkak të koeficientit elektoral. Pra, sipas exit poll- it, por dhe qëndrimit të kampit socialist, mendohet që PS ka konfirmuar shifrën e dhënë, të arritur në 2013, 700.000 vota, të cilat në njëfarë mënyre me ndarjen e re territoriale të Shqipërisë, me garimin jo më në koalicione, por në parti të veçanta e favorizojnë PS- në që të arrijë të marrë më shumë se gjysmën e vendeve në kuvendin e ardhshëm.
Gjithsesi rruga më e drejtë për të festuar, apo për t’u dëshpëruar për këto zgjedhje, është të presim rezultatet zyrtare të KQZ- së. Kështu nuk na duhet të dëgjojmë zhurmën e partive që kërkojnë të manipulojnë vullnetin e komisionerëve, policëve, apo ambientet ku numërohen votat nëpërmjet thirrjeve për fitore kur kutitë ende nuk janë numëruar në gjysmën e tyre. Me shpresën se ky rezultat në kushtet e garancive që ka marrë opozita që drejton KQZ- në, me njëlloj qetësimi të LSI-së dhe prej ardhjes sot të buldozerit amerikan, Brian Hoyt Yeee, do të dalë shpejt...