Basha flet për fitore, Rama: Timonin do ta kemi

Meta: Timoni perëndoi bashkë me bandat e Rilindjes

Procesi i votimit është mbyllur dje në orën 20: 00 në të gjitha qendrat e Shqipërisë.

Komisioni Qendror i Zgjedhjeve mori vendim dje për të shtyrë me një orë votimin, nga ora 19: 00 që është parashikuar në Kodin Zgjedhor, deri në orën 20: 00, duke qenë se pjesëmarrja ishte e ulët në krahasim me zgjedhjet e shkuara. Me mbylljen e procesit të votimit, politikanët kanë shpallur fitoren pa nisur ende procesi i numërimit të votave. Ishte Kryeministri Edi Rama, i cili me anë të një mesazhi të dërguar socialistëve, ka thënë se timoni do të jetë i socialistëve për katër vitet e ardhshme. Ai ka kërkuar mobilizim total në të gjitha qendrat e numërimit, duke u bërë thirrje anëtarëve që të angazhohen në një proces të pastër dhe të pakontestueshëm. Kryeministri ka kërkuar disiplinë shembullore për ta çuar me nder numërimin e votës. "Sipas të gjitha të dhënave, timonin do ta kemi! Ju lutem, ju lutem, ju lutem mobilizim total për çdo votë në numërim dhe qetësi e durim ndaj çdo provokimi! Na duhet proces i pastër dhe i pakontestueshëm. Rroftë Partia Socialiste! Rroftë çdokush që ka punuar dhe po punon për qëllimin tonë të drejtë! Rroftë çdo njeri i zakonshëm i këtij vendi që na ka besuar dhe mirëkuptim i plotë për këdo nuk na ka votuar! Tani përqendrim maksimal dhe disiplinë shembullore, për ta çuar me nder, deri në numërimin e votës së fundit, këtë betejë historike për Shqipërinë që duam!", thuhet në mesazhin e Edi Ramës drejtuar socialistëve.

Por ish- aleati i tij, Presidenti i zgjedhur, Ilir Meta, i është përgjigjur Edi Ramës indirekt me një mesazh, në të cilin thekson se timoni i Rilindjes ka rënë. "Timoni perëndoi bashkë me bandat e Rilindjes. Shqipëria foli. Të gjithë në këmbë për të mbrojtur verdiktin e shqiptarëve", tha Meta.

OPOZITA

Kreu i opozitës, Lulzim Basha, është treguar më i moderuar në daljen e tij për mediat, në të cilën ka falënderuar qytetarët për mbështetjen dhe ata që refuzuan përpjekjet e pushtetit për të blerë votat. "Dua të falënderoj të gjithë qytetarët shqiptarë që votuan sot me qytetari dhe dinjitet europian. Falënderoj në mënyrë të veçantë ata qytetarë që refuzuan përpjekjet e partive të pushtetit për të manipuluar votën dhe deformuar vullnetin e popullit. Tani që voti- mi përfundoi, ka mbetur pjesa tjetër e rëndësishme, vendimtare e procesit demokratik, që është procesi i numërimit. Ndaj dua t'u bëj një thirrje të gjithë atyre që janë përfshirë në këtë proces, të sigurojnë dhe të garantojnë përmes zbatimit të ligjit dhe performancës së tyre që vullneti i popullit të përmbushet. Shqiptarët kanë bërë një sakrificë të madhe sot, duke votuar në një ditë feste fetare dhe në temperatura jashtëzakonisht të larta", ka thënë Basha. Ndërkohë që në një mesazh dërguar krerëve të degëve, kandidatëve dhe numëruesve, Basha ka folur për fitore. "Të dashur kryetarë, kandidatë, numërues, komisionerë dhe vëzhgues, tani nis procesi vendimtar i numërimit të votave. Të gjitha burimet tona flasin për një votë masive të qytetarëve për PD dhe fitoren tonë! Tani është detyra juaj e shenjtë të garantoni numërimin e çdo vote. Unë dhe gjithë demokratët jemi në krahun tuaj për t'ju mbështetur në çdo çast. Punë të mbarë dhe fitore!", ka thënë Basha.