“Morëm qindra denoncime për blerje votash me para”
Ministri i Brendshëm: Çdo krim elektoral do të ndëshkohet
Ministri i Brendshëm, Dritan Demiraj, tha dje se pranë grupeve të posaçme të ngritura për zgjedhjet kanë mbërritur qindra denoncime për tentativa të blerjes së votave.
Mesditën e djeshme, Ministria njoftoi zyrtarisht se ishte shtuar numri i denoncimeve për rastet e dyshuara të veprës penale të shitblerjes së votave dhe intimidimit të votuesve. “Pranë grupeve të posaçme të ngritura në Ministrinë e Punëve të Brendshme dhe Policinë e Shtetit kanë mbërritur qindra denoncime që flasin për një fenomen në rritje të tentativave për blerje të votave. Në këto kushte, Ministria e Punëve Brendshme u bën thirrje të gjithë qytetarëve që të mos bien pre e personave që kryejnë këtë vepër penale, e cila dënohet me ligj”, deklaroi dje ministri Dritan Demiraj. Nga ana tjetër, ai u bëri thirrje qytetarëve që të vazhdonin të denonconin çdo rast ku u kërkohej blerja e votës, apo u imponohej që të votonin për një subjekt të caktuar politik. “I inkurajojmë të gjithë qytetarët që të denoncojnë çdo rast të tentativës për blerje të votës apo intimidime të tjera në numrin e Policisë së Shtetit 112 ku anonimiteti i denoncuesit është i sigurt dhe për raste të abuzimit të punonjësve të Policisë me detyrën në numrin falas 08009090”, tha Demiraj.
DENONCIMET Ministria e Brendshme sqaroi dje të gjithë qytetarët se, për shkak të kufizimeve të posaçme ligjore për rolin e Policisë së Shtetit gjatë ditës së zgjedhjeve, ata duhej të denonconin zyrtarisht në numrin 112. Kjo në mënyrë që Policia e Shtetit të veprojë për të vendosur para ligjit abuzuesit e çdo krimi të mundshëm elektoral. “U bëjmë thirrje edhe anëtarëve të Komisioneve të Qendrave të Votimit që për çdo rast parregullsie të njoftojnë KZAZnë, e cila është autoriteti ligjor që duhet të njoftojë Policinë e Shtetit për të rikthyer normalitetin në qendrat e votimit”, u shpreh Demiraj. Ministri i Brendshëm, Dritan Demiraj, garanton të gjithë qytetarët se çdo krim elektoral do të ndëshkohet me rreptësi sipas parashikimeve ligjore. Ndërsa u bën thirrje edhe subjekteve politike që të ulin tensionet dhe të punojnë bashkërisht për një proces zgjedhor të qetë.