Incidentet, nga rrahjet e komisionerëve te kërcënimet e të shtënat me armë zjarri
Në ditën e votimit kapen disa persona në tentativë për blerjen e votës. Shënohen disa ngjarje në të gjithë vendin
Disa incidente janë shënuar në qarqe të ndryshme të vendit, ku nuk kanë munguar deri në kërcënime, rrahje, tentativë për blerje vote dhe arrestime.
Rastet më të shumta janë shënuar në Shkodër, Elbasan, Korçë, Fier apo Berat. Por edhe në Lezhë dje u shënua një incident i rëndë, ku disa persona qëlluan me armë në ajër dhe goditën një simpatizant të LSI- së me tytën e pistoletës. Fatmirësisht, ngjarja përfundoi pa të plagosur, por incidenti mori përmasa e reagime politike. Vetë i lënduari denoncoi rastin duke pretenduar se peronat i kishin kërkuar të mos votonte subjektin politik të LSI- së, duke qenë se ai njihej si përkrahës i kësaj force. Një tjetër ngjarje u shënua edhe në një fshat të Kukësit, ku disa persona kanë qëlluar me armë drejt një lokali, që, sipas të dhënave, i përket po një përkrahësi të LSI- së. Thuajse në të gjitha qarqet u raportuan tentativa të blerjes së votave. Persona të ndryshëm u ndaluan teksa qarkullonin me mjetet e tyre me shuma të konsiderueshme parash, por edhe ushqimesh. Një fenomen tjetër mjaft shqetësues ishte fotografimi i votës, gjë e cila u konstatua dhe u denoncua jo vetëm nga komisionerët, por mjaft raste u publikuan edhe nëpër rrjetet sociale. Dhunimi dhe kërcënimi i komisionerëve nëpër qendra votimi ishin disa incidente të tjera që u shënuan dje, për të cilat Policia nisi hetimin. Një prej rasteve ishte në Elbasan, ku një komisioner përfundoi në spital, pasi u dhunua nga militantë të PDIU- së. Të shtëna arme pati edhe në Krujë, ndërsa një person u godit me tytën e pistoletës. Po në Krujë simpatizanti i PD- së u sulmua nga persona të tjerë, pasi u pikas duke shpërndarë para në këmbim të votës. Denoncime mes përfaqësuesve të partive për incidente të ndryshme u shënuan në disa rrethe. Ata kanë pretenduar se po tentohet blerja e votës, teksa kanë publikuar edhe foto të këtyre tentativave, ku shihen persona me lista apo qese nëpër duar.