Largohen ministrat e PD, Qeveria me zv. ministra deri në shtator
“Nuk ka marrë miratimin e gjithë anëtarëve të Task- Forcës”
Edhe pse ministrat teknikë kanë dhënë dorëheqjen, përplasja mes tyre dhe kryeministrisë ka vijuar edhe dje.
Burime nga kryeministria pohuan dje se raporti i përgatitur nga Task- Forca lidhur me zgjedhjet nuk mund të konsiderohet i ligjshëm, pasi ai nuk ka marrë miratimin e të gjithë anëtarëve të TaskForcës. Duket se kryeministria këmbëngul në ndjekjen me përpikëri të procedurës ligjore për të miratuar një raport me votim nga institucioni, i cili e përgatit. Por këtij pretendimi të kryeministrisë, i është përgjigjur zyra e drejtueses së Task- Forcës, e cila ka bërë publike të gjithë praktikën ligjore të ndjekur. Zyra e zv. kryeministres Mandija, e cila ka qenë përgjegjëse, njofton se raporti ka ndjekur rrugën zyrtare të protokollimit të tij në Kryeministri dhe u është dërguar vëzhguesve ndërkombëtarë, vëzhguesve vendorë, ministrave dhe anëtarëve të Task- Forcës, si dhe subjekteve politike. Sipas të njëjtit burim, nëse raporti do të kishte ndonjë problem me anën ligjore të tij, protokolli i kryeministrisë nuk do ta kishte pranuar atë për procedurë protokollimi. “Në përfundim të procesit zgjedhor për Kuvendin e Shqipërisë 2017 dhe në vijim të shpalljes së rezultatit përfundimtar të zgjedhjeve, në datë 26.07.2017, nga Komisioni Qendror i Zgjedhjeve, në cilësinë e kryetares së Task- Forcës, ngritur me VKM nr. 473, datë 01.06.2017 “Për marrjen e masave dhe monitorimin e veprimtarisë, sjelljes apo përdorimit të burimeve njerëzore, financiare dhe logjistike të administratës shtetërore, gjatë procesit zgjedhor për zgjedhjet në Kuvendin e Shqipërisë për vitin 2017”, ju dërgoj bashkëlidhur materialin përmbledhës mbi gjetjet, rekomandimet dhe përfundimet e Task- Forcës si dhe anekset dhe tabelat shoqëruese”, thuhet në tekstin që zv. kryeministrja Mandija shoqëron raportin e Task Forcës.
Raporti i është dërguar ambasadores së BE- së në Tiranë, Vlahutin, atij të OSBE-së, Borchardt, përfaqësuesit të ODIHR- it Peter Tejler, ambasadorit të SHBA- ve Donald Lu, kreut të zyrës së Këshillit të Europës në Tiranë, Neukirch, ambasadorit zviceran, Graf si dhe ambasadorit të Suedisë, Johan Ndisi. Po ashtu raporti i është dërguar dhe kryeministrit Rama, ministrave Kodheli, Demiraj, Karabina, Vukaj, Felaj, Shalsi, sekretarit të përgjithshëm të kryeministrisë Agaçi, drejtoreshës së DAP- it, Albana Koçiu, drejtorit të Policisë së Shtetit Haki Çako, drejtorit të Drejtorisë së Parandalimit të Pastrimit të Parave, Arlind Gjokuta, kreut të KQZ- së Zguri, komisioneres për Mbikëqyrjen e Shërbimit Civil, Strakosha, Avokatit të Popullit, Ballanca dhe Prokurorit të Përgjithshëm, Adriatik Llalla. Gjithashtu raportin e kanë marrë edhe subjektet zgjedhore që morën pjesë në zgjedhjet parlamentare të 25 qershorit.