Demiraj u jep fund dilemave: S’do të jem në Qeverinë “Rama”
“I vendosur për të kontribuar në drejtimin e agjencive që merren me çështje të sigurisë”
Ministri i Brendshëm, Dritan Demiraj, krahas dorëzimit të dorëheqjes së tij paraditen e djeshme, u ka dhënë fund zërave se do të jetë sërish pjesë e qeverisë.
Përmes një reagimi të gjatë në Facebook, Demiraj ka sqaruar se kontributi i tij në këto 12 javë ka qenë në funksion të detyrës së tij si ministër teknik dhe jo për të qenë pjesë e qeverisë së ardhshme. “Mendoj se duhet të sqaroj se çdo kontribut i imi në qeverisje është bërë në funksion të realizimit të qëllimeve të treguara më lart në kuadër të detyrës sime si ministër teknik, e sigurisht jo në kuadër të përfshirjes sime në qeverinë e ardhshme të maxhorancës aktuale. Kam qenë dhe vazhdoj të jem i vendosur për të kontribuar në drejtimin e agjencive ligjzbatuese që merren me çështje të sigurisë dhe mbrojtjes kombëtare”, ka deklaruar Demiraj. Aksionet e suksesshme në luftën kundër kultivimit të lëndëve narkotike dhe bashkëpunimi i mirë me partnerët ndërkombëtarë krijuan përshtypjen se Demiraj do të vijonte të qëndronte në postin e ministrit të Brendshëm edhe në shtator, kur Kryeministri Rama do të dërgojë në Presidencë emrat e kabinetit të ri qeveritar.
MINISTRI Dritan Demiraj i ka cilësuar të suksesshme 12 javët e qëndrimit në detyrë si ministër i Brendshëm. Sipas tij, në këto javë është arritur që të kapet një sasi tejet e lartë e lëndëve narkotike, aksione të cilat Demiraj i ka ndjekur edhe vetë në terren. “Prioriteti im për tolerancë zero ndaj drogës në bashkëpunim me Policinë e Shtetit prodhoi disa rezultate të dukshme: 37 tonë kanabis të sekuestruar, 40 mijë rrënjë kanabis të shkatërruara, 13 skafe të konfiskuara dhe mbi 75 vetë të arrestuar për kultivim dhe trafikim të lëndëve narkotike. Masat për të goditur fenomenin e kanabisit kanë qenë maksimale, duke i drejtuar operacionet dhe arrestimet dhe personalisht në terren dhe jo masa propagandistike”, sqaron ministri i dorëhequr. Demiraj ka shprehur vlerësimin e tij për bashkëpunimin me insti- tucionet e tjera në funksion të përmbushjes së objektivave si ministër teknik. “Bashkëpunimi me Prokurorinë e Përgjithshme, Shërbimin Informativ dhe të gjitha institucionet e përfshira në planin e masave ka qenë shumë i lartë, intensiv dhe smart. Kontrolli absolut i territorit ka qenë dhe do të jetë detyrë, që çdo individ me uniformë policore duhet të angazhohet maksimalisht. Një falënderim për çdo efektiv të ndershëm të Policisë së Shtetit. Organizata e Policisë së Shtetit ka punonjës të përkushtuar, që janë në front të parë në luftën kundër trafiqeve të paligjshme në përgjithësi dhe trafikut të lëndëve narkotike në veçanti. Unë, ashtu si dhe çdo qytetar i këtij vendi, mendoj se ka individë të korruptuar, të implikuar e kontribuues në ideimin dhe zbatimin e të ashtuquajturit ‘ plan i kanabizimit të vendit’, dhe për këtë duhet bërë një punë më e mirë në vazhdim nga prokuroria dhe gjykatat për të mos i lejuar këta individë të kthehen në fenomen të shoqërisë shqiptare”, theksoi Demiraj.