Shehu për dorëheqjet e ministrave: Fundi i kukuvajkave kundër PD
Deputeti i zgjedhur i PD- së, Tritan Shehu, i ka cilësuar reagimet e kohëve të fundit për largimin e ministrave teknikë si spekulim kukuvajkash. Në një reagim për mediat, pasi zv. kryeministrja Mandija dhe 6 ministrat teknikë dhanë dorëheqjen, Shehu tha se gjatë muajve të fundit shumë zëra tentuan të përhapin një mjegull në lidhje me PD-në. “Fundi i një spekulimi ‘ kukuvajkash’ ndaj PD- së. Do të largohen apo jo ministrat teknikë të PD-së nga Qeveria, do të ketë koalicion PDPS, apo ndonjë prej tyre do të vazhdojë në Qeverinë Rama2?! Ishin ‘ fantazitë’ e kësaj vere duke i shtuar edhe dilemën e fabrikuar për koalicionin PD- LSI! Shumica e këtyre zërave ‘ të shqetësuar’, veçse tentuan të përhapin një mjegull për PD-në, të krijojnë konfuzion me atë e brenda saj, apo ta kompleksojnë edhe për vendimet e së ardhmes. Besoj se tashmë, mbas dorëheqjes formale dhe deklaratave dinjitoze të ministrave, ka ardhur koha që këta “orakuj” së paku të heshtin, për t’i lënë vendin të vërtetës dhe realitetit”, shprehet Shehu. Deputeti i zgjedhur i PD- së në Gjirokastër është i bindur se PD do të jetë forca kryesore në opozitë, e cila do të mbrojë interesat e qytetarëve. Sipas Shehut, me sjelljen e ministrave teknikë u vërtetua se PD di të respektojë institucionet. Sipas deputetit demokrat, kjo është një premisë se në shtator do të kemi një opozitë të vërtetë, e cila është e nevojshme për integrimin e vendit në BE. “PD, siç është deklaruar, do të jetë epiqendra e opozitës sonë, në mbrojtje të sh- tetit ligjor, qytetarit të lirë dhe vlerave europiane e perëndimore. E gjithë ecuria e kësaj periudhe tregoi veçse se PD dhe Basha dinë të respektojnë institucionet, shtetin shqiptar ( pavarësisht kush qeveris), impenjimet edhe nëse pala tjetër nuk e bën këtë gjë, duke dhënë kështu një shembull përgjegjshmërie dhe transparence. Kjo është një tjetër premisë për një opozitë të vërtetë, e domosdoshme kjo për vendin e rrugën e tij të integrimit, në këto momente shumë të vështira për atë e të ardhmen tonë, ndoshta edhe historike”, u shpreh Shehu.