“Votimi me detyrim”, përplasje mes Spahos e Dodës
Deputetja e PDIU: Jemi jashtë Parlamentit prej pazarit PS- PD
Dy aleatët e vjetër, Partia Demokratike dhe Partia për Drejtësi, Integrim dhe Unitet, nuk pritet të kenë asnjë bashkëpunim politik mes tyre në Parlamentin e ardhshëm. Përfaqësues të lartë të dy forcave politike vijojnë të thellojnë përplasjet mes tyre, duke e bërë të pamundur një pjesëmarrje të PDIU- së në një front të madh opozitar të drejtuar nga PD. Nënkryetari i PD- së, Edmond Spaho, është përplasur sërish në distancë me sekretaren e përgjithshme të PDIU- së, Mesila Doda. Spaho vijon t’i qëndrojë idesë së tij se me ndryshimet kushtetuese duhet përcaktuar edhe mënyra e votimit me detyrim. Sipas Spahos, nevojën e ndryshimit të sistemit duhet ta mbështesë edhe PDIU- ja, e cila edhe pse ka marrë 75 mijë vota nuk ka arritur të fusë në Parlament as kryetarin, as nënkryetarin dhe as sekretaren e përgjithshme. “Shqetësimi im ka të bëjë edhe me faktin që partia që merr 75 mijë vota nuk fut në Kuvend as kryetarin, as nënkryetarët dhe as sekretaren e përgjithshme. Ky është një problem që do vëmendje”, ka deklaruar Spaho. Por qëndrimit të Spahos i është përgjigjur sekretarja e përgjithshme e PDIU- së, Mesila Doda, e cila ka kujtu- ar se mungesa e përfaqësimit të lartë të çamëve në Parlament lidhet me marrëveshjen e PS- PD, në kurriz të të vegjëlve. “Nëse jeni i shqetësuar se pse nuk është në Parlament kryetari i PDIU- së, duhet ta dini që ky është rezultat i pazarit të natës PS- PD. U dhanë 6 ministra teknikë dhe po aq drejtorë ekonomikë, që fushata, po edhe numërimi dhe tjetërsimi i votës të përqendrohej kundër partive të tjera, sepse le ta themi haptas… ky ishte pakti i dy të mëdhenjve kundër gjithë të tjerëve. Për herë të parë u bënë bashkë PD e PS që të mos hapeshin kutitë e Tiranës e të mos dilte në shesh zullumi i gjithëpërfshirjes në vjedhjen e votës në numërim, duke shënuar edhe rastin e parë kur një opozitë nuk dëshiron transparencë. Këto që po them janë fare pak në krahasim me atë të vërtetë që mbulon vjedhjen e mandatit të PDIU- së në Tiranë, dhe kalimin e këtij mandati në favor të PS- së. Gjithsesi, për shqetësimin tuaj që kryetari nuk është në Parlament, më duhet t’ju kujtoj që edhe PD ende është në kohën kur kryetari i saj është jashtë Parlamentit, ndaj nuk është as hera e parë e as e fundit që një kryetar partie nuk është në Parlament”, ka deklaruar Doda. Gjithashtu, sekretarja e përgjithshme e PDIU- së i ka kujtuar nënkryetarit të PD- së, Spaho, se edhe forca e tij politike, edhe pse e madhe, nuk arriti të fuste në Parlament sekretarin e saj të përgjithshëm. “Nëse jeni shqetësuar pse nuk është sekretarja e përgjithshme e PDIU- së në Parlament, ju falënderoj që e ndjeni mungesën time, por nuk është fundi i botës. Nuk arriti as PD- ja, që është parti e madhe, të fuste në Parlament sekretarin e saj të përgjithshëm. Për sistemin po, duhet të shqetësohesh, sepse janë 40.000 vota shqiptarësh që mbetën pa përfaqësim. Kjo duhet të jetë pikënisja për ndryshimin e sistemit. Votë e barabartë dhe me të njëjtën peshë”, deklaron Doda.