Malaj: Ligji qartëson ndarjen akademi- administrim
“Rektori s’emëron, bllokon e as zëvendëson administratorët”
Rektori i Universitetit "Luarasi", prof. dr. Arben Malaj, ka reaguar ndaj debatit aktual mbi funksionimin e bordeve. Në një status të gjatë në rrjetet sociale, profesori shpreh keqardhjen e tij që universitetet preken nga fenomene negative të pengesave, vonesave, mbivendosjes së kompetencave. "Rektorët nuk emërojnë, nuk bllokojnë dhe nuk zëvendësojnë administratorët. Çdo ngatërrim i këtij parimi thelbësor nga rektorët cenon rëndë parimin themelor të menaxhimit të universiteteve publike dhe private, statutet e të cilëve, për të verifikuar respektimin e këtyre parimeve, bëhet nga Ministria e Arsimit dhe Sporteve, përgjegjëse për respektimin e lirisë akademike dhe autonomisë financiare të tyre". Sipas Malajt, ligji i arsimit të lartë artikulon qartë kompe- tencat e rektorit dhe administratorit, njëri si drejtuesi më i lartë i akademikëve dhe tjetri i menaxhimit të universitetit. Ndaj, nuk duhet të ketë përplasje të tilla. "Ky organizim bashkëkohor detyron që rektori të mos marrë asnjë atribut administrativ, ndërsa administratori të mos interferojë në drejtimin akademik, por të lehtësojë përmbushjen e misionit dhe objektivave akademike që ka universiteti", thekson Malaj. Nisur nga ndodhitë e pakënd- shme të ditëve të fundit në mjediset ku prodhohet dije, prof. dr. Malaj kërkon eliminimin e tendencave deformuese dhe përkeqësuese për mirëfunksionimin e universiteteve publike dhe private. Në reagimin e tij, rektori i "Luarasit" shpreh një tjetër shqetësim të tijin, për të cilin thotë se duhet të ketë përgjegjës. "Universitetet publike dhe private kanë gati një vit që nuk miratojnë dot statutin e Konferencës së Rektorëve, një strukturë e parashikuar në ligjin e arsimit të lartë që inicion dhe mbështet reformat ligjore dhe institucionale. Bllokimi i këtij procesi ka përgjegjësi konkrete. Arsimimi në çdo nivel nga parashkollori deri tek universitetet është një e mirë publike, si kur realizohet nga institucionet arsimore publike, edhe nga ato private", nënvizon prof. dr. Malaj.