Ëndrra kthehet në makth, Milani goleadë ndaj Shkëndijës
Udhëtimi i “ballistëve” nuk mjafton
Diferenca është e qartë. Mbi 200 milionë euro të shpenzuara në merkato, janë tregues i pastër i disniveleve që ka mes Milanit dhe skuadrës së Shkëndijës.
Megjithatë, kjo e fundit ia ka dalë që të përfaqësohet me dinjitet përballë furisë së të besuarve të Montelës, megjithëse rezultati nuk e dëshmon këtë gjë. Në takimin e luajtur në stadiumin “San Siro”, Milani ia ka dalë që të sigurojë kualifikimin për në Grupet e Europa Ligës që në ndeshjen e parë, duke qenë se 90 minutat e para përfunduan me goleadën 6- 0.
NDESHJA Nuk do të mbyllet me fund të lumtur ëndrra e Shkëndijës së Tetovës në duelin me Milanin. Eksperienca bën të vetën dhe këtë e kanë kuptuar më së miri tetovarët pas takimit të djeshëm në Ligën e Europës, ku janë mundur me diferencë të thellë nga skuadra italiane. Kuqezinjtë italianë kanë bërë menjëherë diferencën, duke shënuar dy gola të shpejtë me Andre Silvën e Montolivon, për të bërë të qartë rrjedhën që do të merrte ndeshje. Portugezi çoi në 3- 0 shifrat para fundit të pjesës së parë, ndërsa Shkëndija e kishte shumë të vështirë të shfaqej para zonës së Donarumës. Një dominim i vendasve, me raste të shumta për shënim dhe lojë të rrjedhshme në fushë. Tentativat e miqve nuk kanë munguar, por kanë qenë shumë pak për të bërë të mundur rezistencën përballë një skuadre, që ka shpenzuar jashtëzakonisht shumë në rindërtimin e ekipit, me të cilin Montela do të tentojë që ta ringjisë në majën e futbollit europian dhe atë të Italisë.
Në pjesën e dytë erdhën edhe tre gola të tjerë nga italianët që kthyen formalitet kualifikimin. Borini, Antoneli dhe përsëri Montolivo shënuan në portën e Zahov për të mbyllur diskutimet e kualifikimit. Ndaj ndeshja e kthimit në Shkup do të jetë thjesht një mënyrë që tifozët ta përgëzojnë Shkëndijën për rrugëtimin e deritanishëm dhe ta nxisin që ta provojë përsëri në sezonin e ardhshëm, me shpresë që më në fund të bëjë ëndrrën realitet dhe të bëhet pjesë e futbollit të madh.