Vasili: Po hiqen vizat, Kryeministër ku je?!
Kreu i grupit parlamentar të Lëvizjes Socialiste për Integrim, Petrit Vasili, akuzon kryeministrin Rama se nuk ka dëgjuar paralajmërimet nga Europa. Në një status në “Facebook”, Vasili shkruan se Europa i vuri një zero të madhe dëlirit me timon e me tepsi, duke kujtuar se heqja e vizave për shqiptarët ka qenë një arritje madhore duke i çliruar ata nga poshtërimi në dyert e ambasadave. “Po hiqen vizat, kryeministër ku je?! Heqja e vizave për shqiptarët, një nga arritjet më madhore të pluralizmit, rrezikon të zhbëhet. Ishte kjo arritje që çliroi shqiptarët nga poshtërimi në dyert e ambasadave dhe shembi izolimin e turpshëm dhe trajtimin tonë si qytetarë të dorës së tretë. Paralajmërimet nga Europa kanë qenë pa fund, por shurdhëria dhe paaftësia kriminale e kryeministrit ka qenë fatale. Në fund të fundit ai punët e tij i ka fjollë, pavarësisht se qindra mijëra shqiptarë vuajnë skamjen e papunësisë dhe varfërisë. Kryeministri ynë nuk ka veshë, por ka vetëm stomak dhe të madh, madje.
Europa i vuri një zero të madhe dëlirit me timon e me tepsi.
Ç’taksirat ka populli të vuajë dëliret dhe paranojat e një shkollëpakti, llafazan të pashërueshëm?”, shkruan Vasili.
Dy ditë më parë, duke komentuar një raport të Bankës së Shqipërisë për investimet jashtë vendit të bizneseve shqiptare, Vasili akuzoi sërish kryeministrin Rama. “Asgjë me vizion në ekonominë shqiptare, thjesht zhvatje e ditës dhe mpakje e pandalshme e ekonomisë shqiptare. Shkollëpakti, kryeministri ynë edhe nuk e kupton këtë, edhe bën sikur nuk e kupton, të dyja janë rrënim shkatërrimtar afatgjatë për vendin. Logjet e dëgjesave të shkollëpaktit ia shpifën biznesit, ia vranë shpresën dhe optimizmin, ndaj edhe ai largohet jashtë vendit duke krijuar papunësi edhe më të thellë dhe një varfëri që nuk ndalet, por bëhet akoma më e rëndë”, shkruan Vasili në një status të tij në “Facebook”.