Raporti i KLSH për sigurinë ushqimore: AKU s’ju mbron
"Institucioni pa rregullore e pa u mbikëqyrur nga bordi"
Autoriteti Kombëtar i Ushqimit nuk garanton funksionin për të cilin është krijuar.
Ky është konstatimi i Kontrollit të Lartë të Shtetit në një raport të detajuar auditimi në një periudhë 5- vjeçare, mbi shkeljet dhe parregullsitë, të cilat kanë cenuar sigurinë ushqimore e për pasojë jetën ekonomike dhe sociale. Nisur nga kjo, me autoritetin që ka, KLSH-ja i ka drejtuar institucionit 29 rekomandime dhe 22 masa organizative për përmirësimin e situatës deri në vitin 2018.
SHKELJET
Aktualisht, AKU- ja e kryen funksionin e saj në vakum të plotë ligjor. Aktualisht s'ka një rregullore të brendshme nuk mbikëqyret nga bordi si dhe 7 akte nënligjore të ligjit për ushqimin ( nga 12 gjithsej) nuk janë shpallur ende që prej nëntë vitesh nga hyrja në fuqi e ligjit. AKU-ja gjithashtu thuhet se nuk ka një bazë periodike kontrollesh dhe nuk vepron sipas një harte të përcaktuar. Përveç mungesës së kontrolleve, sipas raportit të KLSH- së në përgjithësi në të gjitha pikat mungon infrastruktura e domosdoshme për të garantuar siguri dhe besueshmëri në rezultatet e analizave të mostrave, pasi mungojnë pajisjet e nevojshme. Por, më flagrante është fakti që "të ngarkuarit" për të bërë këtë punë nuk janë të duhurit. "Ka një numër të konsiderueshëm inspektorësh, profesioni i të cilëve nuk ka lidhje me fushën e sigurisë ushqimore", nënvizohet në raport. Por më flagrant është dyshimi për kompromis me bizneset e sanksionuara. Këtë e tregon numri i gjobave në rritje dhe shuma e gjobave e njëjtë. "Megjithëse numri i gjobave është rritur pothuajse tri herë, vlera e tyre as nuk është dyfishuar, gjë që tregon se inspe- ktorët janë të prirur drejt një kompromisi me subjektet në dëm të zbatimit të ligjit për ushqimin". Përveç të tjerash, inspektorët nuk kanë dijeni mbi listën e laboratorëve të certifikuar për mallrat ushqimore të importuara, mbi bazën e të cilëve duhet të paraqitet raportanaliza e kryer në vendet e origjinës. Në këto vite, AKU- ja ka kryer analizat në laboratorë të paautorizuar nga Ministri i Bujqësisë, i cili duhet të miratojë me urdhër listën e tyre, duke përcaktuar tipin e laboratorit dhe analizat, që janë të autorizuar të kryejnë. Të gjithë faktorët e lartpërmendur dhe ata në tabelën përbri tregojnë sigurinë ushqimore në vend, në rrezik, çka citohet qartë edhe në raport. "Rezultatet e analizave tregojnë se përmirësimi i sigurisë ushqimore në vend është i kufizuar, pasi me treguesit e analizave jo konform me standardet, pra të ushqimeve të dëmshëm për shëndetin, ka luhatje të theksuar".