Shkolla “E kuqe”, Veliaj: S’ka më mësim me dy turne
Kryebashkiaku: Sanksione nëse regjistrohen mbi kapacitet
Pak javë para fillimit të vitit të ri shkollor, kryebashkiaku Erion Veliaj u bën thirrje drejtuesve të shkollave të mos tejkalojnë kapacitetin maksimal: 35 nxënës për klasë. Nga shkolla “E kuqe”, tashmë e rikonstruktuar kryetari deklaroi se do të ketë edhe sanksione për drejtorët që nuk e respektojnë urdhrin. “I kam kërkuar Drejtorisë Arsimore që asnjë shkollë të mos e tejkalojë kapacitetin, sidomos tani që kemi shkollat e reja “Hoxha Tahsin”, “Betim Muço” në Kombinat dhe “Ardian Klosi” te Bregu i Lumit. Do të vendosim një sistem dhe sanksione nëse kemi drejtues shkollash, të cilët për të bërë qokat e vogla, tipike shqiptare, nga të cilat nuk shkëputemi dot, shkatërrojmë në fakt të ardhmen e një brezi të tërë”. Sipas Veliajt, mësuesit më të mirë të klasifikuar në portal po shpërndahen në mënyrë proporcionale në çdo shkollë të Tiranës dhe për këtë nuk do të jetë e nevojshme që prindërit të insistojnë të regjistrojnë fëmijët aty ku ata mendojnë se është shkollë më e mirë duke tejkaluar kapacitetet. “Po të shihni sot sistemin e portalit dhe mënyrën si po shpërndahen në mënyrë proporcionale mësuesit që dalin me rezu- ltate më të larta në të gjitha shkollat e Tiranës, kjo është garancia që japim, ndaj nuk ka nevojë që i gjithë komuniteti të dyndet në një shkollë ku tipikisht japin mësim mësuesit më të mirë sipas një sistemi të vjetruar”, nënvizoi kryebashkiaku. Veç kësaj, me rikonstruksionin dhe ndërtimin e shkollave të reja, brenda mandatit, Veliaj u zotua t’i japë fund mësimit me dy turne në Tiranë. “Ne më datën 11 shtator hapim shkollën “E Kuqe”, tërësisht të rinovuar dhe ajo që është më e rëndësishme “Hoxha Tahsin”, totalisht e re, vetëm 2 rrugë më tutje, me 4 kate dhe 27 klasa. Më vjen mirë që kanë filluar regjistrimet edhe për “Hoxha Tahsinin”, të cilët momentalisht po ndodhin këtu derisa të hapen zyrtarisht shkolla”. Pas shumë vitesh, nxënësit e shkollës “E Kuqe” i kthehen normalitetit për të zhvilluar mësimin vetëm paradite. Përfundimi i shkollës “Hoxha Tahsin” do të ulë ndjeshëm fluksin e nxënësve në këtë zonë të Tiranës, por edhe në pjesë të tjera pas ndërtimit të 16 shkollave të reja. Këtë vit shkollor në Tiranë hapen 4 shkolla të reja, ndërsa shumë të tjera kanë përfunduar rikonstruksionin.