Lavazhi pa leje te Liqeni, pezullohet shefi i Komisariatit
TIRANE - Pronarja e një lavazhi të ndërtuar pa leje në zonën e Liqenit Artificial është arrestuar dje nga Policia e Tiranës. Gjithashtu, janë proceduar në gjendje të lirë dy inspektorë të Kontrollit në terren të Policisë Bashkiake të Tiranës. Nga ana tjetër është pezulluar nga detyra shefi i Komisariatit nr. 1, shefi i Seksionit të Policimit në Komunitet dhe Patrulla që mbulonte territorin ku po kryhej punimi, si dhe është përjashtuar nga Policia ndihmësspecialisti i Policimit në Komunitet të asaj zone. Policia e Tiranës tha dje se nga ana e Sektorit për Krimin Ekonomiko- Financiar, në bashkëpunim me Prokurorinë, u bë arrestimi i shtetases Shiqere Hakaj, 51 vjeçe, lindur në Tropojë dhe banuese në Tiranë, pronare e aktivitetit privat. U proceduan në gjendje të lirë A. G., 45 vjeç, me detyrë specialist pranë Inspektoratit të Mbrojtjes së Territorit, Bashkia Tiranë dhe G. P., 29 vjeç, me detyrë inspektor i kontrollit në terren i Policisë Bashkiake Tiranë. Procedimi i këtyre shtetasve u bë për veprën penale "ndërtim pa leje" e "shpërdorim detyre", pasi Parkut të Liqenit Artificial, shtetasja Shiqere Hakaj ka kryer ndërtimin e një lavazhi pa lejen e organeve kompetente, në një sipërfaqe ndërti- mi prej 150 metrash katrorë. Sipas Policisë, inspektorët, edhe pse morën dijeni për këtë ndërtim pa leje, e kanë lejuar duke sjellë pasoja ndaj interesave të ligjshme të shtetasve, në kundërshtim me ligjet në fuqi. Në vijim të veprimeve në lidhje me këtë ndërtim pa leje, nga Drejtoria Vendore e Policisë Tiranë dhe Drejtoria e Standardeve Profesionale në Drejtorinë e Përgjithshme të Policisë u morën masa administrative për punonjësit e Policisë. "Përjashtim nga Policia i ndihmësspecialistit të Policimit në Komunitet që mbulon zonën; pezullimin nga detyra i Patrullës së Policisë që mbulon këtë sektor pranë Komisariatit të Policisë nr. 1; pezullimin nga detyra i shefit të Seksionit të Policimit në Komunitet pranë Komisariatit të Policisë nr. 1; pezullimin nga detyra i shefit të Komisariatit të Policisë nr. 1.". Këto janë masat që ka marrë Drejtoria e Standardeve Profesionale. Nga ana tjetër, Policia tha dje se, po në lidhje me këtë vepër penale, nga ana e Shërbimit për Çështjet e Brendshme dhe Ankesat janë kryer veprime procedurale penale dhe po vazhdojnë të kryhen veprime të tjera mbi dyshimet për implikim të punonjësve të Policisë, të cilët kanë marrë dijeni apo nuk kanë kryer detyrat funksionale, sipas procedurave standarde të punës.