Vrasja e kryekomisarit, Arben Frroku i drejtohet Kushtetueses
TIRANE - Arben Frroku, i dënuari me burgim të përjetshëm me një vendim të formës së prerë për vrasjen e kryekomisarit Dritan Lamaj në shkurt të vitit 2013, hap një tjetër betejë me drejtësinë. Pas vendimit të gati dy muajve më parë të Gjykatës së Lartë, e cila konfirmoi dënimin e tij kapital, Frroku i është drejtuar Gjykatës Kushtetuese. Lajmi u konfirmua nga një prej mbrojtësve të të dënuarit Frroku, i cili aktualisht është në gjendje "arresti në burg" në Holandë, ku u arrestua në një kohë që ishte dënuar në mungesë të tij në Shqipëri. Burime pranë Gjykatës pohuan se në ankimin e paraqitur në Kushtetuese nga ana e përfaqësuesve të tij ligjorë, pretendohet antikushtetutshmëri në gjykimin e kësaj dosjeje në Gjykatën e Lartë. Sipas burimeve, pretendohet se disa prej gjyqtarëve që lanë të pandryshuar vendimin e burgimit të përjetshëm kanë qenë në papajtueshmëri, për shkak se kanë marrë pjesë më herët në shqyrtimin e një prej kërkesave për caktimin e masës së sigurisë ndaj tij. Sipas mbrojtësve, në këtë formë çështja është paragjykuar dhe si e tillë duhet të rigjykohet.
Sipas drejtësisë shqiptare, Frroku është autori i vrasjes me breshëri automatike të kryekomisarit Dritan Lamaj. Ngjarja ndodhi mbrëmjen e 24 shkurtit 2013, teksa Lamaj ishte duke nxjerrë nga parkimi automjetin e tij në vendin e bashkimit të rrugës "Petro Korçari" dhe "Ibrahim Dervishi" në Tiranë. Hetimi i kryer nga Prokuroria për Krimet e Rënda identifikoi biznesmenin Arben Frroku si autorin e dyshuar të ngjarjes. Gjatë gjykimit, ndër të tjera prova u administrua edhe dëshmia e një dëshmitari të mbrojtur, i njohur me identitetin e ndryshuar Arben Ndoka, i cili pretendoi se kishte njohur biznesmenin Frroku në automjetin nga u qëllua kryekomisari Lamaj. Shkalla e Parë e Krimeve të Rënda e deklaroi të pafajshëm Frrokun në lidhje me akuzën dhe vendosi lirimin e menjëhershëm të tij nga qelia. Në verdiktin e shpallur më 29 qershor 2015, Apeli i Krimeve të Rënda ndryshoi vendimin e Shkallës së Parë, duke vendosur pranimin e kërkesës së Prokurorisë për dënimin e tij me burgim të përjetshëm. "Është e qartë se pasoja, vrasja e Dritan Lamajt, është rezultat i drejtpërdrejtë i veprimeve të drejtuesit të automjetit Arben Frroku, e kështu, veprimet e këtij të fundit në lidhje shkakësore me pasojën e vrasjes së policit Dritan Lamaj", thuhej në vendimin e Apelit. Më tej, dosja kaloi në Gjykatën e Lartë, e cila në qershor të këtij viti vendosi të mos pranojë rekursin, duke lënë të pandryshuar dënimin e dhënë ndaj tij.