Amnistia, fshihen kamatëvonesat për kontributet deri në fund të vitit

Të vetëpunësuarit në bujqësi mund t’i paguajnë kontributet e sigurimeve shoqërore dhe shëndetësore për vitin 2017, pavarësisht nëse janë të pasiguruar për vitet e mëparshme, pra nëse nuk i kanë paguar kontributet e detyrueshme të viteve të mëparshme. Periudhat për të cilat nuk janë paguar kontributet, nuk njihen periudha sigurimi. Kështu, viti korent, sipas zonave, do të paguhet: për zonat fushore gjithsej 42.168 lekë ( nga këto 38.400 lekë për sigurim shoqëror dhe 3.768 lekë për sigurim shëndetësor), ndërsa për zonat malore gjithsej 33.168 lekë ( nga këto 29.400 lekë për sigurim shoqëror dhe 3.768 lekë për sigurim shëndetësor). Të vetëpunësuarit në bujqësi, të cilët nuk i kanë paguar kontributet e sigurimeve shoqërore për periudhat e kaluara, por që i kanë pasur kushtet për t’u siguruar si të vetëpunësuar në bujqësi, pavarësisht nga vendbanimi aktual, mund t’i paguajnë kontributet për këto periudha, sipas masës së kontributit, të përcaktuar me vendim të Këshillit të Ministrave, për vitin kur kryhet pagesa. Kështu, gjatë këtij viti nëse do të paguhet viti 2016, ai do të paguhet me kuotat e vitit 2017 dhe konkretisht për zonat fushore me 38.400 lekë në vit dhe për zonat malore me 29.400 lekë në vit. Edhe për pagesat e vitit 2016 apo të pagesave të viteve të mëparshme, nëse bëhet sigurim, fermeri do të ketë përfitimin përkatës nga buxheti i shtetit, të llogaritur sa më sipër. Aktualisht jemi në kushtet e influencës së ligjit të faljes së kushtëzuar të kamatëvonesave dhe për çdo pagesë të kryer për sigurim periudhash të mëparshme, nuk llogaritet dhe nuk aplikohet kamatëvonesë. Kështu, të vetëpunësuarit në bujqësi do t’i paguajnë kontributet e sigurimeve shoqërore, për periudhat nga 1 janar 2011 deri më 31 dhjetor 2016, me masën e kontributit në fuqi, në momentin e kryerjes së pagesës dhe pa kamatëvonesë, por me kusht, pagesën e tyre deri më datë 31.12.2017.