LISTAT ZYRTARE
Universitetet, fituesit për Mjekësinë e Politeknikun
Shpallen listat zyrtare të fituesve në të gjitha degët e Universitetit të Mjekësisë, Politeknikut dhe Shkencat Sociale e të Natyrës në UT
Të gjitha institucionet e arsimit të lartë publik e privat në vend kanë zyrtarizuar listat e fituesve të fazës së parë. Gazeta publikon sot ID e kandidatëve për studentë në degët e shumëkërkuara te Universiteti i Mjekësisë, Politeknikut dhe dy fakulteteve në Universitetin e Tiranës që zgjodhën datën limit të shpalljes së fituesve, ndonëse i kishin përzgjedhur prej ditësh.
Mbrëmjen e vonë të së hënës listat janë ngarkuar edhe në portalin U- Albania. Tashmë gjithçka mbetet në dorën e kandidatëve, të cilët duhet të tregohen vigjilentë gjatë dy javëve në vijim, 29 gusht- 11 shtator, kur përcaktohen fituesit përfundimtarë të raundit të parë, pas zhv- endosjes së vizës së kuqe plot 7 herë. UDHËZIMI PËR REGJISTRIMIN Kandidatët që rezultojnë që në fazën e parë fitues në degën e dëshiruar ( sigurisht ekselentë), u duhet të kryejnë gjënë më të lehtë të mundshme. Të shkojnë që sot në sekretarinë e fakultetit për regjistrimin me dokumentet përkatëse. Procesi shoqërohet me dilema për ata që kanë fituar degë jo fort të dëshiruara dhe duhet të zgjedhin midis vijimit të garës duke hequr dorë nga ajo për një tjetër program. Për t’u ardhur në ndihmë kandidatëve që të bëjnë zgjedhjen më të volitshme, Ministria e Arsimit ka publikuar një udhëzim teknik e bashkë me të edhe një video ilustruese ku qartësohet i gjithë procesi. Të gjitha të dhënat janë në një portal të vetëm: U- Albania, në të cilin çdo kandidat për student akseson përmes ID- së së maturës. Në një tabelë i shfaqen dhjetë preferencat të ngjyrosura me të gjelbër në degët ku rezulton fitues dhe me të kuqe në ato ku nuk ka fituar. Ai duhet të shohë i sati është në klasifikim dhe sa kuota ka në dispozicion. Për shembull, nëse renditet i 500- ti në degën e Mjekësisë me 240 vende gjithsej, e ka të pamundur të fitojë në raundin e parë, në rastin hipotetik sikur asnjë fitues të mos regjistrohet. Shpresa e vetme janë vendet e lira që mund të lirohen nga ata që zgjedhin degë të tjera studimi, duke liruar një vend bosh. Nëse lirohen aq vende sa është rendi i klasifikimit të tij poshtë vijës së kuqe, atëherë kandidatit i shfaqet programi i studimit me ngjyrë të verdhë. Kjo nënkupton që në fazën pasardhëse ai duhet të bëjë regjistrimin ( në rast se vendos). Duhet nënvizuar se për çdo fazë që kalon, dega që ngjyrosej me të gjelbër nuk do të jetë më në dispozicion të tyre. Pra, nëse prisni të regjistroheni në një degë tjetër, humbisni të drejtën e studimit në degën e gjelbër. Ndaj, këshillohet të tregoheni vigjilentë në tabelën e kuotave të lira për fazat në vijim.