Basha: Librat e arsimit të detyrueshëm të jepen falas
"Familjarët e nxënësve paguajnë 15 milionë USD në vit"
Kryetari i opozitës, Lulzim Basha ka kritikuar qeverinë lidhur me ankthin që po sjell te nxënësit dhe familjet e tyre, në prag të nisjes së këtij viti shkollor.
Në një kohë që ka nisur ndarja e teksteve shkollore në të gjithë vendin, Basha ka kujtuar se librat e fëmijëve u kushtojnë prindërve të tyre mbi 15 milionë dollarë çdo vit. Sipas kreut të PD, Shqipëria është vendi i vetëm në rajon, ku librat për shkollimin e detyrueshëm nuk jepen falas. Por edhe pse tekstet shkollore janë me pagesë, Basha ka sjellë në vëmendje faktin që vetë nxënësit dhe prindërit e tyre torturohen me orë të tëra në radhë për të marrë librat. "Në vend që të sjellë gëzim, fillimi i shkollës sjell ankth financiar dhe vështirësi për qindra, mijëra nxënës dhe familjarët e tyre, që paguajnë mbi 15 milionë dollarë çdo vit për librat e shkollave fillore dhe të mesme. Jemi vendi i vetëm në rajon, ku librat për shkollimin e detyrueshëm nuk jepen falas, madje që të blesh këto tekste shkollore, prindërit dhe nxënësit torturohen me orë të tëra në radhë për shkak të sistemit klientelist të shpërndarjes në pak pika", shprehet Basha në një reagim për mediat.
TEKSTET
Basha kërkon nga qeveria që tekstet shkollore për arsimin e detyrueshëm të jenë falas, duke e cilësuar këtë iniciativë si një ndihmë shumë të madhe për familjet shqiptare. Kreu i PD, gjatë fushatës zgjedhore, paraqiti edhe alternativën e tij në lidhje me menaxhimin e institucioneve të arsimit parauniversitar. Basha premtoi se demokratët do të ofronin drekën falas për çdo nxënës të ciklit parauniversitar. Ai kërkoi që qeveria të investojë në tekste dhe arsim për fëmijët dhe jo në luks qeveritarësh dhe ministrash. "Librat për arsimin e detyrueshëm duhet të jepen falas dhe të shpërndahen nga vetë shkollat. Kjo do të ishte një ndihmë të madhe për familjet shqiptare dhe shkollimin e fëmijëve të tyre. Një qeveri në shërbim të njerëzve, investon në libra dhe mjete shkollore, jo në fasada ministrish dhe luks qeveritarësh", tha Basha.