Vasili: Turizëm dhe mjedis bashkë, injoranca bën festë
Kryetari i grupit parlamentar të LSI-së, Petrit Vasili e cilësoi si shfaqje të injorancës faktin e bashkimit të Ministrisë së Turizmit me ministrinë e Mjedisit. “Turizëm dhe mjedis bashkë, injoranca bën festë. Kryeministri shkollëpak çuditi dynjanë dje me injorancën e padëgjuar shtetërore të tij. Turizmin dhe mjedisin, oponentët e papajtueshëm të njëri- tjetrit, injoranca e frikshme e Kryeministrit i vuri bashkë”, shkruan Vasili në Facebook. Sipas tij, kryeministri, nga prioritet për ekonominë shqiptare, e ktheu turizmin në një sektor pa rëndësi. “Turizmin, nga mundësi madhore zhvillimi, e ktheu në hiç. Turizmi i drogës ka rëndësi për të dhe ai ka shënuar vërtet suksese. Do të kemi Qeverinë më të kriminalizuar, por edhe kryeinjoranten e Europës. Shkollëpaktit aferim...”, shkruan Vasili. Më parë, Vasili akuzoi skemën e re qeverisëse, me shqetësimin se ka zhdukur Ministrinë e Integrimit. “Qeveria, që lindi sot nga gropa e ujërave të zeza të votave të drogës dhe të krimit, asgjësoi që në lindje të saj integrimin europian, asgjësoi ekonominë dhe ricikloi banditizmin politik të udhëhequr nga shkollëpakti dhe antimorali. Sa turp!...”, shkruan Vasili. Një ditë më parë, kryetarja e LSI- së, Monika Kryemadhi e cilësoi kabinetin e ri qeverisës, qeveri të vjetër. “Forcë e re qeverisëse?! E vetmja gjë e re, në këtë qeveri të re me qeverisje të vjetër, do të jetë fakti se Shqipëria po shkon drejt humbëtirës së pandalshme! Dhe jo vetëm ekonomike, por edhe shpirtërore. Sepse “Qeveria e re” e kryeministrit të vjetër, me votat e blera nga paratë e krimit, nuk është dhe nuk do të jetë më gjë tjetër tashmë, përveçse një instrument me pak ministri, ku secila do të ketë si komanduese të saj, bandën përkatëse që grabiti me “sukses” votat. Sepse vetëm kështu mund t’iu shpërblehet “mundi” dhe “sakrifica” e kriminelëve dhe trafikantëve që përfshiu në zgjedhjet e 25 qershorit, Kryeministri i ardhshëm”, u shpreh Kryemadhi.