Pronat në Himarë, Dule: Këshilli Bashkiak do mblidhet në fshatin Kuç
Kreu i PBDNJ- së, Vangjel Dule akuzoi Kryeministrin Rama, se me klanin e tij, po synon të rrëmbejë dhe tjetërsojë pronat e himarjotëve. Përmes një deklarate për mediat, Dule denoncon anulimin e mbledhjes së Këshillit Bashkiak të Himarës dhe organizimin e saj në fshatin Kuç, më datë 30 gusht. "Më 25 gusht, qytetarët e Himarës u ftuan të marrin pjesë në mbledhjen e jashtëzakonshme dhe të hapur të Këshillit të Bashkisë, me objekt planin e përgjithshëm të zhvillimit vendor. Por, në vend të transparencës, debatit konstruktiv dhe vendimmarrjes demokratike, pjesëmarrësit u gjendën përballë një situate të pakonceptueshme të dhunës së verbër ndaj tyre nga ana e Policisë Bashkiake dhe të anulimit, përfundimisht, pa asnjë arsye dhe motiv të mbledhjes së thirrur. Gjatë fundjavës, shumë nga qytetarët pjesëmarrës u thirrën nga policia e shtetit në kundërshtim të hapur me ligjin dhe procedurat e tij "për të dhënë shpjegime" për pjesëmarrjen e tyre në mbledhjen e hapur të këshillit, ku ishin ftuar publikisht. Ndërsa sot, në shkelje flagrante të afateve dhe në papajtueshmëri të hapur me ligjin për funksionimin e pushtetit vendor, thirret sërish mbledhja e Këshillit Bashkiak për datën 30 gusht, kësaj rradhe jo në selinë e vet, por në fshatin Kuç", shprehet Dule. Sipas tij, qëllimi është rrëmbimi i pronave të minoritetit grek në këtë zonë. "Së pari, dëshirojmë të vëmë përsëri dhe përsëri në dukje, se këto veprime synojnë ekskluzivisht rrëmbimin me çdo kusht dhe mënyrë të pronës nga pronarët e vetë të ligjshëm dhe tjetërsimin e statusit pronësor më gjerë, në dëm të banorëve autoktonë të Himarës dhe në favor të interesave oligarke, por edhe të atyre klienteliste të z. Rama. Së dyti, këto veprime përbëjnë dëshmi të pakundërshtueshme, që provojnë në mënyrën më të prekshme, prapësinë e qëllimeve të vërteta të fshehura, pas ndarjes së fundit territoriale- administrative për Himarën", shprehet Dule. Ai u kërkon diplomatëve të huaj në Tiranë që të kthejnë vëmendjen ndaj asaj që po ndodh në Himarë. "U drejtohemi ambasadorëve të nderuar të akredituar ne vendin tonë, veçanërisht atyre të SHBA, BE- së, OSBE- së dhe Këshillit te Europës, që të kthejnë syrin dhe vëmendjen, si edhe të kontribuojnë që t'u jepet fund këtyre padrejtësive absurde në dëm të komunitetit historik te Himarës. Mentalitete, metoda dhe veprime të tilla nuk kanë asgjë të përbashkët me shtetin e së drejtës, praktikat europiane dhe civilizimin tonë perëndimor", shprehet Dule.