Berisha publikon SMS nga qytetarët: Radhë për të blerë librat
Shqetësimin për radhët e gjata të prindërve, të cilët prisnin për të marrë tekste shkollore për fëmijët e tyre, e ngriti edhe ish- Kryeministri Berisha. Përmes profilit të tij në "Facebook", Berisha publikoi një video ku shfaqeshin në radhë shumë prindër në Shkollën "Vasil Shanto" në kryeqytet. Berisha ka publikuar mesazhin e ardhur nga një nxënës, duke u solidarizuar me shqetësimin për radhët e krijuara. "Radhë në pisk të zhegut, për librat në shkolla! "Përshëndetje Berisha! Shiko se si bëhet radha për shpërndarjen e librave në shkollën "Vasil Shanto". Turp dhe faqe e zezë. Shiko çfarë bëhet për dijen e fëmijëve tanë", thuhet në mesazhin e publikuar nga ish- Kryeministri Berisha në "Facebook". Procesi mësimor, për të gjithë nxënësit e sistemit parauniversitar, do të nisë të hënën e 11 shtatorit, ndërkohë që sa i takon procesit të shpërndarjes së teksteve mësimore, mendohet që ato të përfundojnë deri më 10 shtator. Sipas pikave të shpërndarjes së teksteve shkollore, çmimi për një komplet varion midis 1850- 4500 lekë, në varësi të vitit mësimor, të cilit nxënësi i përket. Lideri i opozitës, Basha kërkoi që qeveria të lehtësojë nga xhepat e familjeve shqiptarëve shpenzimin për tekstet shkollore. Arsimi ka qenë një nga sektorët më të kritikuar të qeverisë nga opozita, lidhur edhe me reformën e ndërmarrë nga Ministria e Arsimit. Ish- Kryeministri Berisha është përballur disa herë me ministren e rikonfirmuar të Arsimit, Lindita Nikolla, lidhur me cilësinë e arsimit në vend.