NË MARS U BLLOKUAN 6 MAKINA
Policia e Tiranës ka nisur një aksion për verifikimin e të gjitha automjeteve, që dyshohet të jenë vjedhur e më pas trafikuar në Shqipëri.
Aksioni nisi në mesin e javës së kaluar dhe u finalizua mbrëmë me sekuestrimin e 12 makinave luksoze dhe 5 motorëve. Operacioni i koduar "Summer 2017", u krye nga oficerët e Antitrafikëve, ata të Forcës së Posaçme Operacionale dhe Kërkimit, në bazë të planit të masave të hartuara nga Drejtoria e Policisë së Tiranë, për "Identifikimin, bllokimin, sekuestrimin e automjeteve të vjedhura, e të trafikuara në vendin tonë". Gjatë këtyre ditëve u bllokuan për verifikim në ambientet e Drejtorisë së Policisë Tiranë, dhjetëra automjete luksoze. Gjithashtu, u shoqëruan për të dhënë deklarime edhe drejtuesit e këtyre mjeteve. Burime zyrtare të Policisë thanë se verifikimet u kryen nga oficerët e Seksionit të Trafiqeve të Paligjshme, në bashkëpunim me oficerët e Interpol Tiranës. Mësohet se nga verifikimi me anë të sistemit ASF2 të Interpolit, 17 prej mjeteve rezultuan të parregullta, pasi dyshohet të jenë të vjedhura në vende të ndryshme të Bashkimit Europian. Gjashtë makina luksoze dhe dy motorë u sekuestruan në Tiranë, para 5 muajsh, gjatë një tjetër operacioni antitrafik të koduar "Vin number", të organizuar nga oficerët e Seksionit të Trafiqeve të Paligjshme. Automjetet e bllokuara, dyshohej se ishin vjedhur në vende të ndryshme të Bashkimit Europian dhe më pas ishin trafikuar në Shqipëri. Këtu u ishin ndryshuar numrat e shasisë dhe dokumentacioni dhe u janë shitur personave të ndryshëm. Tre prej personave që kanë blerë këto automjete u ndaluan nga Policia dhe ndaj tyre nisi procedim penal në gjendje të lirë. Nga ana tjetër, Policia identifikoi dhe shpalli në kërkim 5 persona, që sipas hetimeve, kanë vjedhur dhe trafikuar mjetet në vendin tonë. Për këtë arsye ka nisur hetim në gjendje të lirë për 17 personat që i kishin në përdorim. Nga ana tjetër, mësohet se po hetohet edhe në drejtim të identifikimit dhe ndalimit të personave, të cilët i kanë vjedhur e më pas i kanë trafikuar në Shqipëri këto automjete.
OPERACIONI Policia tha dje se ka finalizuar operacionin e koduar "Summer 2017", duke sekuestruar 12 automjete luksoze dhe 5 motorë, të dyshuara si të trafikuara, duke proceduar penalisht 17 persona. "Në kuadër të prioriteteve të Drej- torisë Vendore të Policisë së Tiranës, për parandalimin, evidentimin dhe goditjen e paligjshmërisë, një tjetër operacion është organizuar dhe zhvilluar për bllokimin e automjeteve motorike të trafikuara në Republikën e Shqipërisë nga vendet e BE- së", tha dje zyrtarisht Policia. Gjatë operacionit, janë sekuestruar në cilësinë e provës materiale 12 automjete luksoze dhe 5 automjete të dyshuara të trafikuara dhe me numër shasie të falsifikuar. Pas ndryshimit të numrit të shasisë, këto automjete ishin pajisur me tar- ga të rregullta. Mësohet se makinat e sekuestruara janë të modeleve të fundit të "Mercedez", "Audi", "BMW", "Range Rover" dhe "Toyota". Gjithashtu, janë bllokuar edhe dy motorë "Yamaha T- Max", një "Suzuki GSXR 750" dhe dy "Aprilia Scarabeo".