Armët drejt Anglisë, Cullhaj: Nuk dija se çfarë kishte në pako
TIRANE - Sajmir Cullhaj, 32- vjeçari i dyshuar si personi që postoi drejt Britanisë tri pako me pjesë automatiku kallashnikov në to, mbajti qëndrim mohues në sallën e gjyqit. Pakot u gjetën të enjten nga skanerët e sigurisë të bagazheve në Aeroportin e Rinasit. Në përballjen e tij me Gjykatën për Krimet e Rënda, gjatë seancës së caktimit të masës së sigurisë, i riu tha se nuk kishte lidhje me trafikun e armëve përmes postës. Para se gjyqtari i gatshëm, Bib Ndreca, të caktonte masën e sigurisë "arrest në burg" për të, i dyshuari pranoi të kishte postuar pakot, por pa ditur përmbajtjen e tyre. "I kam postuar sepse ma kërkoi një shoku im, pasi unë kisha makinë. Nuk e kisha idenë së çfarë ndodhej brenda në to", mësohet të jetë shfajësuar në sallën e gjyqit i dyshuari, Cullhaj. Në të njëjtin qëndrim ka këmbëngulur edhe mbrojtësi i tij ligjor. Me gjithë pretendimet e paraqitura, gjyqtari vlerësoi më të fortë dyshimin e ngritur nga përfaqësuesi i Prokurorisë në sallën e gjyqit. Në përfundim të seancës, gjyqtari Ndreca vendosi të deklarojë të paligjshëm arrestimin në kushtet e flagrancës për Cullhajn, por hetimin e tij në masën ekstreme të sigurisë "arrest në burg". Jashtë sallës së gjyqit, avokati mbrojtës i Cullhajt, mbrojtësi Armir Veizi, tha për mediat se do ta ankimojë vendimin në Apelin për Krimet e Rënda. Hetimi paraprak i Krimeve të Rënda ka identifikuar si bashkëpunëtor të Cullhajt, një person me precedentë të mëparshëm penalë, shtetasin Neritan Faria, i cili është shpallur në kërkim. Sipas Prokurorisë, pakot, me peshë 13 kilogramë në total, janë postuar në një agjenci postare ndërkombëtare në Durrës dhe kanë pasur si marrës tre shtetas britanikë. Dy prej tyre, me adresë në Bedford dhe tjetri në Watford. Organi i Prokurorisë ka dyshime se marrësit nuk janë persona realë, por emra fiktivë, pasi për ta është lënë i njëjti numër kontakti. Nga ana tjetër, për të humbur gjurmën, Cullhaj nuk ka përdorur identitetin e tij për dërgimin e tyre, por emrat e dy të moshuarve nga Shijaku.