Prefekti i Fierit, Bregu: Ndihmojini qytetarët, mos u shembni ndërtesat
Prefekti i qarkut Fier në një mbledhje të Shtabit të Emergjencave për shkak të numrit të madh të zjarreve të rëna gjatë kësaj vere, ka folur edhe për problemin e ndërtimeve pa leje. Prefekti gjithashtu në fjalën e tij u ka tërhequr vëmendje strukturave të policisë për ndërtimet pa leje, duke kërkuar bashkëpunim mes strukturave të policisë dhe njësive vendore për të zbatuar ligjin. "Nuk duhet të jetë qëllimi prishja e objekteve pa leje. Qytetarët duhet të orientohen dhe ndihmohen si të marrin leje. Prandaj duhet të bashkëpunojnë institucionet që të mos ketë burokraci duke dëmtuar qytetarët", është shprehur Vasil Bregu. Ndërkohë, sa u takon zjarreve, situatën e ka cilësuar alarmante, pasi gjatë kësaj periudhe në të gjithë qarkun numërohen 356 zjarre të rëna. Duke marrë parasysh këtë situatë, prefekti ka kërkuar bashkëpunim të strukturave të policisë deri edhe prokurorisë dhe Shërbimit Informativ Shtetëror për të parandaluar, ndëshkuar dhe vënë para përgjegjësisë zjarrvënësit. Sipas prefektit të qarkut Fier, Vasil Bregu, nuk ka zjarre të rastësishme, prandaj të zbulohen dhe të ndëshkohen autorët. "Nuk ka asnjëherë zjarre të rastësishme dhe aksidentale, prandaj të gjithë ju që jeni këtu duhet të bashkëpunoni për të gjetur autorët dhe t'i vini para përgjegjësisë", ka thënë Bregu ndër të tjera. Prefekti ka kërkuar gjithashtu nga njësite vendore të përmirësojnë infrastrukturën dhe teknikën në mjete për të mundësuar në kohë shuarjen e zjarreve, ndërsa ka vënë theksin te subjektet private të vendosin masat e mbrojtjes nga zjarri.