Cikalleshi: Ishte keqkuptim, respektoj vendimin e trajnerit
Sokol Cikalleshi është sjellë edhe një herë si një profesionist i vërtetë. Ai ka refuzuar të bëjë polemika me trajnerin Panuçi dhe ka thënë se mungesa e sotme në orarin e caktuar me ekipin kombëtar ishte thjesht pasojë e rrethanave që u krijuan me firmën që duhej të hidhte te klubi i ri. Në një deklaratë për "Panorama Sport" ai thotë: "Më vjen keq për keqkuptimin me trajnerin. U krijua një rrethanë me klubin e ri ku duhej të firmosja, e cila më imponoi ndryshimet e orareve. U përpoqa të isha sa më korrekt edhe me axhendën e përfaqësueses dhe i kërkova leje trajnerit, por kjo nuk qe e mun- dur. E respektoj vendimin e trajnerit, sepse në fund të fundit edhe ai ka rregullat e veta. Ishte thjesht një keqkuptim. Sokol Cikalleshit asnjëherë nuk i ka munguar respekti për ekipin kombëtar dhe kjo nuk do të ndodhë kurrë as në të ardhmen. Ishte një keqkuptim dhe tani thjesht do të më duhet të respektoj vendimin e trajnerit", deklaroi Cikalleshi për gazetën.
Kontrata - Merr fund enigma e të ardhmes së sulmuesit Sokol Cikalleshi. Bomberi kavajas ka zgjedhur klubin e tij të ri, duke u bërë pjesë e skuadrës turke Osmanlispor. 27- vjeçari ka hedhur firmën në kontratë ditën e sot- me, në një marrëveshje e cila i ka kushtuar edhe përjashtimin nga ekipi kombëtar, pasi nuk u paraqit në grumbullim siç i kërkonte trajneri Panuçi. Mosgjetja e hapësirave te Bashakshehiri solli që Cikalleshi të zgjidhte një skuadër të një niveli disi më të ulët, për t'u aktivizuar rregullisht. Aktualisht, Osmanlispor nuk është duke treguar formë të mirë në kampionat, ku në 3 takime ka siguruar vetëm 1 pikë. Sulmuesi shqiptar pritet të jetë pikë referimi në sulmin e skuadrës turke.
Shifrat - Transferimi i Sokol Cikalleshit tek Osmanlispor i ka kushtuar klubit turk plot 4.5 milionë euro. Një shifër goxha e lartë që nxjerr në pah besimin e drejtuesve të skuadrës turke për sulmuesin shqiptar. 2 milionë euro u derdhën në arkat e Bashakshehirit për të blerë kartonin e bomberit kavajas. Ndërkohë "Panorama Sport" mëson se Cikalleshi do të fitojë 850 mijë euro në sezon. 27- vjeçari ka firmosur një kontratë 3- vjeçare me klubin e Osmanlispor dhe shumë shpejt pritet t'i bashkohet skuadrës së tij të re në stërvitje. Sulmuesit nuk i mbetet gjë tjetër veçse ta justifikojë me gola shpenzimin marramendës të bërë nga drejtuesit e klubit për të siguruar shërbimet e tij.