Qeveria e re, Rama: Jo federatë ministrish, shkurtime në administratë
“Ne kemi numrin më të ulët të punonjësve që paguhen nga buxheti në rajon. Numrin e drejtorëve e kemi më të lartë”
Kreu i qeverisë, Edi Rama, zhvilloi takimin e dytë me qeverinë e sapokrijuar në Llogora për të përcaktuar objektivat kryesorë të maxhorancës për muajt e ardhshëm. Në një bashkëbisedim me gazetarin e “Panoramës”, Aristir Lumezi, gazetaren e “TCH” Elona Meço dhe gazetaren e “Klan”- it, Elja Zotka, kreu i qeverisë foli për projektin e tij të ardhëm politik, “PS plus”. Sipas kreut të qeverisë, në përfundim të këtij mandati qeverisës, shumica duhet të dalë si “PS+”. Rama foli edhe për mospërfshirjen në kabinetin e ri qeveritar të ish- ministrit të tij, Saimir Tahiri. Sipas kreut të qeverisë, Partisë Socialiste nuk i duhet vetëm një qeveri e fortë, por edhe një skuadër e fortë brenda forcës së saj politike, por sidomos në Kuvend dhe komisionet parlamentare. Kryeministri theksoi se do të ketë një shkurtim të administratës, por jo në një masë të konsiderueshme, pasi pjesa më e madhe do t’i bashkëngjitet ekipit të ri të ministrive. Pjesa më e rëndësishme aktualisht, sipas Ramës, është përzgjedhja e zv. ministrave. Sipas kreut të qeverisë, është e rëndësishme që çdo ministri të ketë ekipe të plota politike, ku edhe zv. ministrat të jenë në kapacitetet që do të kërkonte një ministër. Kryeministri u ka kujtuar anëtarëve të rinj të kabinetit qeverisës se detyrat i kanë marrë nga ai, por karrigen gjithsecili duhet ta mbajë vetë dhe duhet ta justifikojë me punën që duhet të bëjë në dikasterin që drejton.
BASHKËBISEDIMI ME GAZETARËT Pse 11 dhe jo 7 apo 9, a patët një kriter për numrin e ministrive dhe bashkimin? Nga u nisët, që dolët te këto 11 ministri?
Ne i pamë me shumë kujdes. Kjo periudha e tranzicionit të gjatë është absurde nga njëra anë por, nga ana tjetër, na dha mundësinë që të bëjmë shumë studime të hollësishme, me modele. I pamë me kujdes dhe besoj se është njëlloj optimumi. Pastaj nuk është se ka një rregull fiks, nuk është si një ekuacion, o e bëre mirë, o gabim. Kjo besoj unë është një produkt edhe i eksperiencës se ku kanë qenë ato vështirësitë nga pikëpamja e koordinimit dhe shpejtësisë dhe ku ngecin e ku burokracia bëhet më shumë problem, ku janë kundërvendosjet, ku janë momentet ku ndodhin mbivendosjet. Besoj që është optimale.
Me njerëz të politikës që kam folur unë këto 2- 3 ditë, kam idenë që bashkimi është jashtë logjikës së decentralizimit të demokracisë. Sa më shumë të detajuara shërbimet dhe ministritë, aq më mirë për të funksionuar sistemi. Ndërkohë që ju keni ndjekur këtë tjetrën, i keni bashkuar...
Këtu, faktikisht, konsolidohet drejtimi politik. Sfida është që të forcohet gjithë pjesa e mekanizmave që nuk është thjesht ministria, por janë agjencitë. Ju e patë atë prezantimin që bëri Niko. Ne kemi nga numri i punonjësve, më të ulëtin në rajon, punonjës shteti që paguhen nga buxheti. Nga numri i drejtorëve kemi numrin më të lartë se janë krijuar thjesht për të bërë qoka.
Pse u la jashtë Saimir Tahiri? Ju vetë e keni vlerësuar si një ministër të suksesshëm, edhe fakti që si koordinator i qarkut të Tiranës ai pati një rezultat goxha të mirë. A kishte një arsye?
Kjo nuk është si puna e skuadrës kombëtare të futbollit. Nuk është qeveria seleksioni i atyre që do të hyjnë në fushë e të tjerët janë në stol, sepse ne kemi nevojë shumë të madhe që t’i kemi të fortë të tre komponentët, edhe partinë, edhe grupin, edhe qeverinë. Nëse komponenti i grupit do të na dobësohej e një pjesë e kapaciteteve tona, që fare mirë mund të ishin ministra nuk do të investoheshin për grupin, ne do të kishim problem shumë të madh. Jo thjesht për përmasën e grupit, por dhe për vetë qeverinë. Sepse ka shumë nevojë qeveria që të ketë një grup, jo thjesht të fortë që ta mbrojë në Parlament, por dhe që ta mbajë nën presion në kuptimin e gjërave që duhen bërë. Pjesa tjetër pastaj, që unë e thashë dhe në Asamble, është pjesa e partisë. Edhe aty duhet të kemi disa kapacitete shumë të mira që të mund të vazhdojmë punën me ndërtimin e këtij koalicioni që them unë dhe të hapjes e të ripërtëritjes së partisë.
Ju e shkritë Ministrinë e Integrimit sepse ne nuk do të hapim negociatat? Ju e shkritë sepse nga Ministria e Jashtme mund të bëhet mirë çështja, apo ndoshta se kur të hapen negociatat, do të kemi një kryenegociator e ministria është e panevojshme?
Jo. Unë besoj shumë që është si puna e një trupi, me më shumë peshë dhe mbipeshë, e nuk është se bëhet më shumë lëvizje e më shumë aktivitet. Ne i kemi të gjitha mundësitë të bëjmë më shumë a më pak. Në këtë rast, ne thjesht do ta spostojmë të gjithë pjesën e problematikave të integrimit që kanë të bëjnë me koordinimin e të gjithë dikastereve dhe me përgatitjen e negociatave, tek Ministria e Jashtme dhe është një praktikë që e kanë pasur disa vende. Në momentin që hapen negociatat, vendoset një kryenegociator, ndërtohet një ekip dhe kryenegociatori faktikisht në të gjitha vendet është në rang anëtari qeverie, pavarësisht se nuk është pjesë e formacionit të qeverisë, por nga pikëpamja e peshës që ka, dhe nuk është e nevojshme që të kesh një burokraci më vete aq të madhe. Jo se nuk ka qenë e nevojshme deri tani, por tani nuk besoj se është e domosdoshme, kështu që është thjesht një kalim apo përqendrim te Ministria e Jashtme. Ka një gjë që po e diskutonim dhe dje, që tani është shumë e rëndësishme, që të kemi një ekip shumë të mirë në nivelin e dytë, në nivelin e zëvendësministrave. Në Shqipëri është bërë traditë që të jenë indulgjenca, jo thjesht politikë, por edhe si të thuash njëlloj pozicioni për të shprehur respekt, mirënjohje për njërin apo tjetrin, edhe atëherë kur kanë qenë si të thuash të vendosur aty për një punë të caktuar, përgjithësisht kanë qenë si njëlloj trupe e lënë jashtë, pa peshë, ose me gjëra të vogla. Tani është shumë e rëndësishme që të bëjmë një përzgjedhje shumë të kujdesshme të zëvendësministrave dhe të kemi ekipe që të funksionojnë realisht si ekipe politike dhe çdo sektor të ketë një zëvendësministër që të ketë kapacitet, siç do të ishte për të qenë ministër i atij sektori dhe në kuptimin e përgjegjësisë. Edhe aty do të ketë një zëvendësministër që do të merret ekskluzivisht me integrimin dhe që do të ketë përgjegjësi të plotë për ta ndjekur atë proces. Ndërkohë që ministrat do të kenë një përgjegjësi shumë më të madhe udhëheqëse dhe koordinuese të ekipeve të tyre politike. Sfida tani është që të bëjmë një zgjedhje sa më të mirë të zëvendësministrave e t’i kemi sa më të përshtatshëm për punët me sektorët. Nëse tani kemi ministri të bashkuara, Financat dhe Ekonominë, pjesën e punës që ka të bëjë me sipërmarrjen, patjetër që aty do të ketë një ekip zëvendësministrash që do të kenë peshën të drejtojnë sektorin nga pikëpamja e ekzekutimit të përditshëm të gjithë orientimit dhe vendimmarrjes së përditshme politike të ministrit.
Përveç shkrirjes dhe bashkimit të disa agjencive, inspektorateve, do të kemi edhe administratë më të vogël?
Unë besoj që do të jetë më e vogël. Jo shumë më e vogël, sepse e thashë, ne kemi një numër punonjësish, më të voglin në rajon. Vetëm Gjeorgjia, në të gjithë Europën, e ka më të vogël numrin e punonjësve që paguan, se ne. Bëmë goxha shkurtime në 2013- n, por përsëri do të bëjmë shkurtime sepse bashkimi i Ministrisë së Financave me Ministrinë e Ekonomisë dhe komponentit të Punës te mirëqenia nuk do të thotë që do të bashkohen mekanikisht të gjitha bashkë e të jenë si federatë ministrish. Do të jetë një ministri, kështu që do të funk-
Sfida tani është që të bëjmë një zgjedhje sa më të mirë të zëvendësministrave e t’i kemi sa më të përshtatshëm për punët me sektorët. Nëse tani kemi ministri të bashkuara, Financat dhe Ekonominë, pjesën e punës që ka të bëjë me sipërmarrjen, patjetër që aty do të ketë një ekip zëvendësministrash që do të kenë peshën të drejtojnë sektorin nga pikëpamja e ekzekutimit të përditshëm të gjithë orientimit dhe vendimmarrjes së përditshme politike të ministrit
sionojë si një ministri dhe faktikisht numri do të shkurtohet në mënyrë drastike.
Duket sikur ju keni shkrirë ministritë që i drejtonte LSIja më përpara. E ndoshta kjo është një mënyrë për të hequr dhe ata që LSI mund të ketë futur në punë.
Jo, sepse ne kemi drejtuar Financat, Ekonominë dhe Mirëqenien dhe Punën, e nuk ka lidhje kjo. Ose për shembull, një ministri që nga pikëpamja e, si të thuash bunkerizimit politik, ishte më problematikja, Ministria e Bujqësisë është po ajo. Me ndryshime të brendshme të vogla. Nuk është se e kemi pasur gjëkundi këtë tendencë.