Basha: Çmimet e librave janë shtrenjtuar me 33 %
“Qeveria të investojë për libra, jo për fasada ministrish”
Kryetari i opozitës, Lulzim Basha ka vijuar kritikat e tij ndaj sistemit të shpërndarjes së teksteve shkollore. Për të dytën ditë me radhë, kreu i PD ka kërkuar nga qeveria të ndërhyjë për të ndalur radhët e gjata dhe ankthin e prindërve për të siguruar tekstet shkollore për fëmijët e tyre.
“Mijëra prindër dhe nxënës vazhdojnë radhët e gjata për tekstet shkollore anembanë vendit. Jemi vendi i vetëm në rajon ku librat për shkollimin e detyrueshëm, jo vetëm nuk jepen falas, por janë shtrenjtuar çdo vit. Dy shembuj: paketa e librave të detyrueshëm për klasën e parë është shtrenjtuar me 33% këto 4 vjet, nga 11 mijë e 790 lekë në vitin shkollor 20122013, në 17 mijë e 760 lekë në vitin shkollor 2015- 2016. Për të njëjtën periudhë, paketa e librave të detyrueshëm për klasën e gjashtë është rritur me 23 për qind, nga 38 mijë e 70 lekë në 48 mijë e 920 lekë”, ka theksuar Basha. Në reagimin e tij për mediat, kreu i opozitës ka nënvizuar edhe faktin se krahas keqmenaxhimit të mënyrës se si po shpërndahen tekstet shkollore për këtë vit shkollor, ato rëndojnë më shumë në xhepat e kryefamiljarëve. Basha i ka bërë thirrje edhe një herë qeverisë, që për arsimin e detyrueshëm, tekstet shkollore të jepen falas. “Kjo rritje çmimesh ka rritur barrën ndaj prindërve, e cila rëndon edhe më shumë, sepse të ardhurat reale mesatare të familjeve shqiptare kanë rënë prej inflacionit dhe ngrirjes së pagave. Shpërfillja e arsimit është dëm i pariparueshëm për të ardhmen e vendit. Librat për arsimin e detyrueshëm duhet të jepen falas dhe të shpërndahen nga vetë shkollat. Për këtë, mjafton që qeveria të investojë për libra dhe mjete shkollore paratë që çon për fasada ministrish dhe luks qeveritarësh”, deklaroi Basha.