Viti i ri shkollor, vëllai i Kryeministrit turk bamirësi për fëmijët jetimë
Organizata “Gjysmëhëna e kuqe” në Turqi, e drejtuar nga vëllai i kryeministrit turk, Ilhami Yildirim ka zgjedhur të jetë pranë fëmijëve jetimë shqiptarë në prag të festës së Kurban Bajramit dhe nisjes së vitit të ri shkollor. Në bashkëpunim me fondacionin ALSAR dhe Këshillin e Qarkut Tiranë, ata ndanë dje 3200 pako me veshmbathje në aktivitetin me moto: “Ju nuk jeni vetëm”. Drejtori i “Gjysmëhënës së Kuqe” turke për Stambollin, Yýldýrým vuri në dukje se nisma të tilla i shërbejnë forcimit të bashkëpunimit midis dy shteteve, ndërsa premtoi se kontributi do të rritet vit pas viti. “Ne si “Gjysmëhëna e Kuqe Turke” po shpërndajmë ndihma me rastin e afrimit të festës së Kurban Bajramit. Kontingjenti i këtyre ndihmave është 3141 pako. Muajin e Ramazanit, për familjet në nevojë në të gjithë Shqipërinë, kemi shpërndarë rreth 1400 pako ushqimore dhe këtë vit do ofrojmë 12 mijë pako për këto familje. Këto organizime nuk bëhen vetëm në Shqipëri, por në gjithë shtetet e Ballkanit. Në të ardhmen planifikojmë që këto ndihma të rriten dhe të vazhdojmë bashkëpunimin me organizatat shqiptare dhe me shtetin shqiptar, sepse ne i konsiderojmë vëllezër shqiptarët. Lidhjet tona kanë qenë gjithmonë të forta dhe do të shtohen edhe më shumë”. Kryetari i Fondacionit “Alsar”, Mehdi Gurra, gjatë fjalës së tij nënvizoi se kurorëzimi me sukses i kësaj vepre bamirësie u mundësua falë kontributit nga organizata “Gjysmëhëna e Kuqe e Turqisë”. Sakaq, i pranishëm në aktivitet, zëvendësambasadori i Turqisë në Tiranë, Sinan Cem Ba º , u shpreh entuziast për këtë akt bamirësie në Shqipëri, duke nënvizuar marrëdhënien e veçantë midis dy vendeve. “Ky organizim bëhet me rastin e Kurban Bajramit dhe na e shton gëzimin tonë. “Gjysmëhëna e Kuqe Turke” shpërndan ndihma në të gjithë botën. Populli shqiptar dhe Shqipëria kanë një vend të veçantë në zemrën e popullit turk dhe këtë e tregojnë dhe ndihmat që shpërndahen sot.” Pranë fondacionit “Alsar”, janë regjistruar rreth 3200 fëmijë jetimë. Një ditë më parë, u bë ndarja e ndihmave për 1100 jetimët në Tiranë, ndërsa ditët në vijim, ky projekt do të shtrihet në qytetet e tjera të vendit.